Moin leeve Lüüd,

dor is överall swor wat los in de Welt, de ward jümmer verrückter, dücht mi. In de Ukraine kann dat nich ruhiger warrn, solang de Separatschiks jümmer wieter Noschuuv vun de Russen kreegen. De dat jo avers gorni sünd. Zar Wladimir schüttkoppt as parkinsonleeg und sien Botschafters seggt ok nur “ Es gibt keine Beweise.“ Und de Welt lött sik för dumm verköpen. All de grooten Weltretter – de niege Politess Merkel und de boberste Sheriff Obama und de Hölpwachtmeister ut Franzmanien -all ward se an de Nees rümfööhrt. Avers wi hebbt jo Fru Örtel – de hett de europäischen Grenzen jo mächtig ümrööhrt und dorbi is denn tomindst de Krim wedder ukrainisch woorn. Een Dank dorför an de niege Pegida, de sik nu „Direkte Demokratie för Europa“nöömt. „So eenfach is Schach!“ hett een Bekannten fröher jümmer seggt. Avers Sleswig-Holsteen dorför an Dänemark afgeeven!? Nee, dor höört de Spoß denn avers op! Und överhaupt? Worum denn an de Dänen? Nur wiel de wat rotet in eere Flagg hebbt, höört se lang noch nich de Russ to, Fru Örtel! Dor is di wohl in Geographie wat dörchgahn. Nositten. Nee, tööv mol –  worüm ward se nich  Schlagersängersch? – Wo doch de CDU jichtens een Quote infordert hett. Denn künnt se sogor op NDR 2 dagin, dagut rümblarrn. Weer dat nich wat!? Blond sünd se jo al und de Rest ward denn mit de Technik trechklamüsert. De givt dat bi´n Radio jo förwiss-de Technik. Und sall keen Blendwark sien. Nich as bi Flinten-Uschis Trupp. De mööten jo Bessenstööl swatt anmolen und as Kanonenrohr op eere Panzers tüteln. Dormit de annern Ingriep-Truppen vun de NATO dat bi´n Öven nich marken. Avers wat mooken se, wenn se denn as fixe Ingriepers mol an de Front mööt und süllt denn scheeten?!? Mit „Peng!“ ropen is dat jo man nich doon. Uschi,Uschi – viellicht sast man doch de Fingers vun de Drohn und de Hubschruvmaschin looten und de veerhunnert Millionen, de dor al wedder an „Mehrkosten“ opslogen worrn sünd,  anners anleggen. Bit dat sowiet is, sast di man ´n beeten trügg hooln. De düütschen Suldoten süült ganz vörn in de Slachtenreeg mitdoon!? Mit Holtgewehr und Katschi, oder wo hest di dat vörstellt!? Auugen rechts! Uschis Elite kümmt!!!