En Wisch bito dat Sprüttenhus in Gerdau. Dor maakt de Füerwehrlüüd ok de en of anner Öven, dormit dat bi de Insätze denn ok forts klappen deit. Doch se bruukt nich de heele Flaag. Un so heff ik denn as grööne Ratsherr bi en Sitten de Vörslag maakt, dat dor doch en Blomenwisch för de Immen Sinn maken wöör. Dor weer de Anter, dat güng nich, dat is de Wisch to´n Öven för de Füerwehr. Dat is nich so enfach. Nu, en poor Weeken later, geiht dat liekers los un enfach weer dat ok. Ratsherr Hahnemann (SPD) hett mit de Besittersche un mit de Bobersten vun de Füerwehr Gerdau snackt un is mit se eens worrn, dat dat en goode Idee is. Ratsherr Meyer (parteilos) hett de Striepen denn ümgrubbert un de Saat spent. Midderweeken in de Morgenstünnen hebbt de dree de Flaag fertig maakt, sait un inharkt.
De Füerwehr will sik ok üm dat Geeten ümdoon, dormit ut de Saat denn ok Blomen ward! So ward dat denn en sachs 100m² groote Immenkamp geven. Dat höcht mi as dull un sachs is dat de Start för de en of anner, de ok noch en lütt Stück vun siene Scholl afkniepen mag, dormit de Insekten wedder de Schangs op mehr Nektar hebbt. Wi hoopt, dat de Saat veele Blöten bringen deit!
Nu mütt se denn blots noch dat Sprütten rünnerfoohrn, denn doode Immen bruukt keen Blomen… Albert Einstein hett al seggt: „Wenn de Immen fleitengahn sünd, hett de Minsch blots noch veer Johr to leven…“. Woneem sünd de Lüüd, de krakeelt un föddert, wat sik dor endli wat ännern mutt!? Op Snutenbook un in de Gazetten lamenteert se, dat doch al so leeg is, aver se kieken nich op sik sülm. Woans süht dat denn in juune Goarns ut!? Wat is mit de Randstriepen vun de Koppels – givt dor noch en Veelfalt an Feldblomen? Mit de „Blöhstriepen“ op´n Acker is dat nich daan, de ward ja na kotte Tied wedder ünnerplöögt, wieldat de Buer keen Geld mehr dorför vun de EU kriegen deit. Ward Tied, dat se dor wat ännern doot, man dat is wedder en anner Thema.
Beste Grööten
Niels
