Jümmers Arger mit de Pingelee

Mann in de Tünn, wat heff ik mi wedder argert över de ballte Nulleree bi de grooten Telefonsellschappen. Vör Johrn har ik mi al vun de magentafarven Vereen trennt, to düer un de Hölpsline weer för de Mors. Denn bün ik bi de Mannesmann-Arcor-Vodafone-Gang ween. Ok keen lüttere Mess un de Verdrag weer achtermaandig, aver dor mutt en woll mit klaarkamen, wenn en in de Heid an Holt husen deit. Nu bün ik bi de drütte groot Vereen lannt, för dat halve Geld duppelt fix (vörher keen dreedusend, nu lockten se mit 25 MBit, aver minnst süss! un en Flatrate ok in dat Mobilnet, nich blots en poor Freeminuten…- Telefonica-o2 – man „can do“ is dor al schon mol gorni bin. Dat heff ik nu faststellt, as ik mien ole „Telekom-Router“ op o2 inrichten wull… An Mandag weer de Ümschaltdag, de se ankünnt harrn. Dat hett klappt. Wunnerbor, he´k dacht, dat is de erst Vereen, de hölt, wat he anpriesen deit. Ik weer toversichtlich. Denn heff ik de Kabelaage wedder anstöpselt un op de gröönen Latüchten keeken. Power, WLAN, DSL – süüsstig Perzent weern na kotte Tiet an lüchten, blots noch Internet un Telefonie , de veerte und föffte Latücht, denn is dat daan. – Doch dor dee sik nix. Op mien Klapprekner stünn: „Kein Internet“, de Router weer nich to finnen, nix to maken. Good, he´k dacht, denn nocheens allens afstöpseln un nee starten. Nix. Denn full mi in, dat de Router ja op Warksinstellen trüchsett warrn müss, so weer dat bi´t verleden mol. Daan, wedder starten, Latüchten bekieken, een, twee, dree,… Sluss. Ik fung so en lütt beten an to schimpen un to quesen… also de Hölpsline över Smartphone anropen. Nahbi dat Windoog to Straat hebbt wi af un an twee of dree Balken in „edge“, dat reckt för´t Telefoneern… döffst di blots dorbi nich rögen…Autometiseert weer de Hölpsline un ik heff mi denn dörch een Bült Fragen quält. Denn wull´n se en „Sicherheitspasswort“, veer Tahlen, de ik bi de Opdrag sülm vergeven harr. Dat weer vör över süss Maande! Wo ik de opschrievn heff, dat weet ik doch hüüt nich mehr! Also de Wahrheit seggen, ik weet nich… Keem de Fraag vun de Computer, of se mi en niege Link senn´n  sulln. Ja, he´k seggt. Un kuum fiev Sekun´n later brummte mien Apparat. Toversichtlich heff ik de Link opmaakt, man in „edge“ mit twee Balkens lött sik keeneen Siet laden… So een Schiet… Wedder anropen, heele Prozedur nocheens dörchmaken, denn heff ik „Nee“ seggt, as se mi wedder na de Linkversenn fraagen deen. Anroop toenn. Stump afbroken hebbt de Swienjacken mien Hölpsroop! De Mandag güng to Enn. Keen Internet, keen Telefon un „edge“ op Mobil… Dank di, o2!

Dingsdag glieks na dat Fröhstück har ik noch en beten Tiet, wedder versöcht. Doch nix to wullen, bi de Hölpsline wedder nix rutkreegen. Denn de geniaal Infall – ik heff doch noch en niegelnagelniege Router vun Vodafone liggen. Sachs is de beter? Is ja en „Modell 2017″… Also allens afstöpselt, de „easybox“ utpackt un allens wedder anstöpseln. Dütmol ward dat wat, dach ik, as de Klapprekner mi forts de Verbinn to düsse Router wiesen dee! Denn stünn dor „Bitte warten, die Verbindung zum Vodafone-Netz wird hergestellt.“ Mi swaan nix goodet… un dat keem denn ok so: Verbinn afbroken… Schiet, Schiet un nochmol Schiet brummel ik nich liesen vör mi hen. Ik weer ja alleen tohus. Dat mutt doch manuell… Ne, mutt nich. Ik heff denn na en poor Versöken googelt, wat en Glück an düsse Dag güng. Dor stünn, dat de niegen Vodafoneboxen blots noch automatiseert lopen un sik ok blots noch in dat Vodafone-Net inwählt. Anners nix. Verdwarste Mess! Nu wöör ik doch füünsch! -Na, erstmol to Wark fohrn un denn nocheens över nadenken… De Avend weer de Klenner mit en anner Termin fullschreven. Dag twee sünner Internet un Pingelkassen…

Dag dree- de Morgen weer wedder beten Tiet un ik weer an versöken. Toerst de Mess vun Vodafone weer afbuun – Elektroschrott! Denn de ole Speedport weer antüdeln. De glieke Prozedur von vörn… De Firefox kennt em nich. Denn keem mi en Infall- dor weer doch duntomolen mit Vodafone, as de Blitz de Kist fleddert hett, dor heff ik denn doch de Speedport rutkraamt un dat güng ok nich – ik wüss noch wo ik de Notizen harr un heff se rutsöcht. Süh! Dor har ik opschreven, dat dat blots mit en annern Browser güng – de Explorer. Hest Du nich sehn, ik de Firefox utmakt un op dat blaue „e“ drückt. Wedder Töven un as se denn warmlopen weer – nix. Kennt he nich. Worüm nich? Denn keem de Erkenntnis – ik heff ja nu Windows 10 opspeelt un nu is dat nich mehr de Explorer, nu heet dat Deert anners un löppt woll ok anners… Dat weer doch to´n Müüs melken… Dor full mien Blick op noch en anner Browser, de ik op de Rekner heff – T-Online 7.0 – Wenn dat nix is! Also nocheens de en Browser slüten, de drütte openmaken un Lüüd, wat meent jii!? – Richtig! Nu stünn dor „speedport- Einrichtung“! Strike! Ik de Daten vun de Breef ingeven un dat duer nich lang…tachentig Perzent! De Internetlatücht weer nu ok gröön! Blots noch gau de Daten vun Telefon ingeven… Dag veer güng toenn. Jümmers noch keen Telefon! En beten Sott hat, man nu weer de Fru in´t Hus ok füünsch. Weer ik nich mehr alleen mit de Argeree.

De veerte Dag güng wieter as de drütte – Daten för dat Telefon intorichten. De finn ik op „Meino2“ in´t Net. Dor kann´k ja nu ran, dat veerte grön weer ja so schön an lüchten. Na en beten Söken heff ik dat denn ok funn´un de „Sip-Daten“ ingeven as se vörgeven weern. „Fehlermeldung – Sie haben die falschen Daten eingegeben! Wenn Sie ohne Einrichtung der Telefonfunktion fortfahren möchten, drücken Sie „OK“! Uaaaaaaargh! Of so in Oart. Wat nu!? Nocheens de Hölpsline anropen – dütmol wedder „Ja“ seggen, Internet geiht ja nu. Töövtiet weer nich lang un denn weer doch würkli en echte Minsch an de anner Siet. Blots har de keen Plan! Erst keem he arrogant üm´t Eck un meen ik weer to blöd, de Daten staaht doch dor! Ik em verklaart, dat ik allens so ingeven heff, as dat vörgeven weer. Denn hett he blots noch seggt, dat se sik mit „Fremdroutern“ nich utkenn´n wöörn un ik sull doch eenfach mol „googeln“. Echt dull, so en „o2-can do“…

Denn heff ik nakeken un blots noch en Bült arrogante Meen vun „Experten“ funn´ , de anner Vertwiefelte rünnermaakt hebbt. Good, dach ik, denn mutt woll doch en o2-Router ran. Nützt ja nix…Ik har mi al dormit affunn, as mien Oog nocheens op mien Notizen fulln – Bi de Ingaav vun de DSL-Nummer mutt de Null weg un dorför de „49“ stahn, harr ik mi mol opschreven… Ik dat ännert un- Tata – hunnert Perzent! Fiev grööne Latüchten! Ok dat Telefoneeren geiht! Weer doch heel eenfach, weer´t nich!?

Ik freu mi al op dat Inrichten vun´t Glasfaser bi de Lünecom mit en Fritzbox, dat sall denn ja automaatsch gahn!

In de Nacht is denn de Heizanlaag utfullen… Dat givt so Daag, dor löppt dat nich…

Let jüm nich argern! Ik heff de verleden Dag so en dicket Fell kreegen, mi argert dat blots noch en lütt beten, würkli!!! Grrrrrr…

Niels

 

Print Friendly, PDF & Email

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.

This site uses Akismet to reduce spam. Learn how your comment data is processed.