Moin leeve Lüüd,
nu sünd de Iishilligen vörbi und de Summer kümmt to uns. Man vundaags noch Frost und Küll und nu glieks wedder an de dörtig Grad! Dat is jümmers een Sprung, de nich jedeen afkann. Denn hett de een oder anner vun ju dat mit´n Kriesloop und ward ganz dösig in Breegen. Man good, dat dat wedder weggeiht. Bi annere givt dat dat nich, de speelt alltied dösig rüm und meent, de Lüüd marken dat nich. So is dat wohl ok mit denn een oder annern Buern. In letzten Maand harr ik doröber schreben und dor geev dat ok Reaktionen op. De Landklau is bekannt und de toständigen Stellen mooken dor nix an. Und denn kann dat ok noch ween, dat se för dat Tweimooken vun de Ackerrandstriepen noch Toschüsse vun de EU instrieken. Lüüd, wenn dor een Buer is, de sien Scholl eenfach grötter mookt und dat denn ok noch as sien eegen versilbert, denn is dat doch Bedruch mit Vörsatz, oder!? So wat kann doch nich „versehentlich“ vörkoomen, as dat vun keen lut Elbe-Jeetzel-Gazett vertellt worden is!?!?!? – Dat kann mi keeneen vertellen!!!
Vertelt hett vör so veertig Lüüd ok een Billermooker över dat, wat he in Fukushima knipst hett – an süssten vun Maimaand höll he een Billervördragg över de groote Havarie vör dree Johren – und wat se dor mit dat Volk mookt hebbt und jümmer noch mooken. He hett ok opzeigt, wo verstrikt dor de Politik mit de Wirtschaft und de Mafia, de dor Yakuza nöömt ward, is. Ik magg mi gor nich utmolen, wo de Bobersten in Dütschland woll mit denn Michel ümgohn wörrn, wenn so een Anlag bi uns havareern dää? – Avers dat givt dat jo in de Wirklichkeit nich, in Dütschland kann dat so wat gor nich geben, hier bi uns givt dat keen Vertuschen, Beschieten und Beschubsen – nee, bi uns doch ni.
Und wenn jii doch mol dat Geföhl hebbt, dat dor wat nich ganz richti is, frogt man mol no bi juune kommunalen Schultheißen, de warrn ju vertellen, dat allens in Ordnung is und dat dat so sien mutt. Opbegehren hört sik nich, dat givt dat nich bi de Lemminge! – Frie no Hans Scheibner: „Das macht doch nichts, das merkt doch keiner!“ Basta!
Dor weer doch ok noch wat mit de Schultheiß … In een lüttet Dörp sall dat in de nächsten Maanden wat nieget geben. De ole will sien Sessel rümen und dor sall een niege her – man de Kronprinz sall dat nu wohl nich mehr warrn – tominst no buten för dat blöde Volk sall dat so utsehen. Denn ik magg nich glöben, dat he sik eenfach so düssen Posten entgahn loten will. Se wüllt wohl een Marionett insetten, de noch, wat de Politik angeiht, een witte West hett (oder noch keeneen vun de Placken schnackt hett?!-tweetet oder- se (de Marionett) hett eentlich gorkeen Plan vun dat, wat se dor mookt) und denn ward ut de tweete Börgermeister-Reegg stüert. Ik bün all bannig gespannt, wat se dor wedder tosomenspinnt.
So, nu lett jüm man nich argern,
und scheun in de Reeg blieben!
Bit to´n nächsten Mol –
Niels
Wöörbook – Wörterbuch
de Iishilligen – die Eisheiligen
Küll – Kälte
Billermooker – Fotograf
Placken – Flecken
Schultheiß – heute: Bürgermeister
