Moin leeve Lüüd,

in de GroKo geiht dat wieter as se anfungen harrn. Intracht gifft  dat nur bi´t Posieren för de Fotografen. Sonst günnt de een denn annern nix und se hebbt sik dat nächste Problem ophalst. So kann man fien vun de Sooken aflenken, de de Michel fix vergeeten sall. – Diätenerhöhung to´n Bispill (dor weern se sik ok utnahmswies eenig) – dor mutt man gau wat Nieet finnen und dat niedere Volk aflenken! Dor hebbt se sik denn een utsöcht, de wohl Billers vun nokelige Görn köfft hem sall . „E!-Dat ii -s Porno!“ reepen se und denn fungen se an, sik mit Schiet to beschmieten. Woneem hett wann watt weeten!? Wokeen hett wohl Edathy watt flüstert!? – Denn rullte ok all de erste Kopp – de vun denn Friedrich kullerte de bayerischen Barge dohl. Dor hett Mutti betimmt wedder een „SMS“ vun eeren garantiert afhörunsikkeren Handy schickt – und -bups! – wegg weer he! Dat duerte nich lang und dat bullerte denn gewaltig twüschen de grooten Hügel und de König vun Bayern und de inschnappten Friestaatler schreegen:“ Wenn een vun uns opfert wart, mutt avers ok een vun de roten Socken wegg, sünst speelt wi nich mehr mit ju!“ – Ik bünn mol gespannnt, wodenni  dat wohl wieter geiht! – Dat se sik eere Portjuchees fullstoppen war ik trotzdem nich vergeeten – ik hett jo nich Michel!

Een annere Geschicht is dat Gejuche üm de Suldoten – Flinten-Uschi- de niege boberste Suldotin – hett toerst de Losung „Teilzeit-Soldat“ utgeben, de Uniformierten sünd dorop losgahn as dull – vör Begeisterung! Dat weert doch noch, morgens een beeten de Kasern fegen und Technischen Deenst mooken (keen de good schmert, ward ok good fohrn!) und nomiddags een beeten de Görn bekümmern. Dat is doch mol´n Schnack! Man – dat weer nur de halbe Wohrheit, sotoseggen dat Anfüttern! Denn kuum veertein Dagg loter keem de tweete Deel vun Uschis Plon – „Dütschland hett wedder dat Seggen in de Welt und mutt sik siene Verantwortung stellen“, vertelln se. Wat heeten sall, dat de „Staatsbürger in Uniform“ to Hus een beeten mehr Tied för eehre Leevsten kriegen, wiel se denn jo an de Front mööten und de schwatten Plastikbüddels wohrschienlich nich nur aff und an mol no Hus komen – denn hett sik dat wat mit Deeltied, denn een beeten doot givt nich! Wüllt wi dat wirklich!?

Niels

Lexikon:

gau – schnell

Portjuchee – Geldbörse (Portemonnaie)

Flinten -Uschi : Bundesministerin der Verteidigung Ursula v.d. Leyen (die Bezeichnung ist der Sendung „Neues aus der Anstalt“ entliehen…)