Moin leeve Lüüd,

nu hebbt wi denn Solot – de Pegidas und Legidas und wo se all heeten, warrn övermütig. De eenen künnt mit eere wohre Gesinnung nich mehr achtern Barg holen und „outen“ sik as brune Tiedgenossen, de annern meent, se künnt al vöraf seggen, dat hunnertdusend Lüüd to eer „Avendflaneern“ ut de Hüsen kommt.      Adolf Bachmann hett nu utspeelt und de Leipziger „Patrioten“ sünd  wiet vun de anseggte Tohl weg. Hunnertdusend -dorvun hebbt se dröömt. De Gröttenwahn is ja ok meist alle Diktatoren eegen ween… Und al wedder hebbt de „Anti-Pegidas“ de vergrätzten Lüüd wiest, dat nich all Lüüd de twielichtige Gestalten sünner Argumente achteranloopen. Avers wi mütten oppassen, ok, wenn se sik nich een sünd, vörbi is dat lang noch nich! Dat is een Ansammeln vun untofreedene Lüüd, de to en grooten Deel nich achter düsset Speel kieken. Se marschiert achteran und meent, se wöörn eeren Unmut een Stimm geven. Doch se ünnerstützen de rechten breegenklütterigen Mallbüddel vun de „nationalen“ Spinners.  Ik bü´n luurig und ok een beeten bang dorvör, of se de Lüüd, de nu vun  eer Chaiselong kroopen sünd, ok bi de Woohlen dorto anholen künnt, dat se dorhingooht. Und denn!? Stell di mol vör, de kreegen een Andeel vun de Stimmen, de viellicht sogor över fiev Perzent liggen deit…und dat vun een poor vun düsse Vereene. Denn kuschelt se sik tosomen und sünd viellicht op eenmol so swor, dat se wat mitbestimmen wüllt… und denn koomt dor noch wölk, de nich so wiet rechts sünd und stützt se ok noch und denn hebbt se op eenmol Regierungsmacht. Und denn…wat bün ik heel froh, dat no unset Grundgesetz keene Ermächtigungen mehr möglich sünd… Ofschoon, wenn de Draghi dörch de Achterdöör de Pleitestooten in de EU ut de Not holen mag und dorbi gegen dat Recht verstött… Mi ward ganz schwummerig…Bi de Griechen hett dat jo nu denn Ruff no de linke Siet geven. Dor  sünd een Barg Lüüd, vör allen de ut de Geldkaste, överhaupt nich good op to snacken. Dat is koomen, as dat koomen müss. De Lüüd hebbt nu een Tied dat Kottholen und üm´t Verrecken spoorn mitdoon – nu hebbt se sik demokratisch dorvun friemookt. Erstmol…

Bit to´n nächsten Mol-

Niels