Moin leeve Lüüd,

Zarewitsch Wladimir is muksch. He is vun denn G20-Gippel fröher afsuust as dat ploont weer. Erst hett he noch ganz een op groote Herrscher mookt und de EU-Jungs und Deerns hebbt em de Döör vun siene Residenz inrennt. He hett to alle Vorwürfe nur denn Unschulligen speelt, as wenn dat nur üm lütten Schietkram güng. De speelt all dösig, hett he wohl dacht. Avers denn weer´t doch to veel. De Ami hett em noch „Agressor“ nöömt und nu weer´t ut. Afflug. Ok so´n koppleegen KGB-Offizier is jo nur een Minsch. Magg man gorni meenen.

Avers kieken sulln se op em! Dat kriggt he denn mit sien Achterrüm-Geheimdeenst-Schnacken ok hin. Nu loopen se em denn doch wedder de Döörn in – ünner grooten Protest,  betont de Merkelsch und de annern jümmer wedder. Und he, ehre Mallheit Putin, beduert ok jümmer wedder, dat he – he is Russland – nix dorför kann. NATO und  EU hebbt em twungen de Krim to annektieren und de Separatschiks in de Ostukraine antoerkennen. Avers ünnerstützen!? Nee-dat mookt he nich. De Panzers,  Suldoten und Scheetgewehre, de se kreegen hebbt – nich vun em. Fohrtüchslangen vun Militärs, de över de Grenz no de Ukraine fööhrt? – Givt dat nich! De spinnt, de Beobachters.

He is avers ok een Schelm, de lütt Wladimir! Fööhrt se all an de Nees rüm und tuckt bi fründlich Grienen mit de Schullern dorto. De Sanktionen, de vun de Amis dortokoomen sünd – dat ward de Amis richti dreepen, hett he wiesseggt. De Ami hett siene Kapitalisten-Lüüd avers vertellt, dat se dorvun kuum wat marken wöörn…. Nu lött de Zarewitsch siene Lüüd blötten, keene Froog. Dat kennt se jo nich anners. Avers de Weltwachtmeisters kriggt so ok örntlich een mit. Dorför ward he sorgen. Dor kann ok de Düütsch´nix an ännern mit eer scharpet kritisieren. Dat ward em nich bang mooken, wenn dat niege Düütschland mit sien imperialistischet Opbegehren op de groote Klaviatur mitdaddeln will. Wenn se sik dor man nich verspeelt. Se sall man leever dorop achten, dat tohus allens inne Reeg is. Ofschon;  eentlich mookt se dat jo richti – de rote Kugelblitz mookt de Lüüd mit sien Energiehampeln scheun vergretzt und föhrt so de ole Tant wieter in Richtung achtein Perzent – minus X!