Vun de groote Politik 10/15

Lüüd, wat is dor blots loos!? De rechten Aasfleegen hebbt Toloop as nich kloog – in de Ümfraag vun ehrdaags hebbt se se bi acht Perzent sehn! Mi ward heel anners tomoot, wenn ik dat bekiek. De Thüringer Hetzkerl hett woll ok een hocken – und dat nich minn! Wo kann dat angahn, dat se so een breegenklüterig Nöhln tojuucht? – Is een Deel vun de Michels würkli al so mall woorn dörch de „BILDungsmedien“, de se sik ok noch friewillig rintrecken doot? Und denn düsse türksche Eerdmann bi PEGIDA, de an hissen is  vun KZ -Anlagen, de „ja leider nich in Bedreef sünd“ – und de ward dankborer Wies ok noch in elke Norichtensenn wiest – de „Wutbörgers“ juucht und nickkoppt ünner luut Krakeel! – De so nömten Christdemokraten sünd sik ni een – wat de Merkelsch dor utposaunt seggt veele nich to. Aver hett se nich recht!!!??? De Minschen mutt doch erstmol holpen warrn!! Aver de Perzente bi de Polit-Ümfraag sünd de swatten Lüüd woll höld – twee Perzent sünd se rünner in de verleden Afstimm – tohoop mit de Sozis hebbt se jümmers noch över süssti Perzent Tostimm –  Ik vermoot mol, dat sünd de Lüüd, de ok al vöraf an de  rechte Kant vun de Swatten stünn´und nu een Pedd wieter gahn sünd…-  Und denn de Keerls ut dat Land wiet ünnen – dat geev de een orer anner Momang, wo ik de Seehofer und siene Steebelputzers ja tostimmt heff – dat giv ik ja to – man in düsse Fraag is he op´n Holtweg. Dat is in mien Oog Tünkram und drivt de Lüüd, de vör luuter Bangwesen nich mehr klor dinken künnt, in de Arms vun de bruun Bregen. Und dat is gresig! De  Michel is een Minsch, de mit dat Afännern vun siene Pfründe nich so gau kloor kümmt. Und erstmol süllt de annern…, „Ik tööv leever noch een Bült af“ – und in dat Bangmoken und Hetzen instimm´ is ja veel eenfacher, as sik würkli een Kopp doröver to moken, seggt de Michel … Dat givt jo man good ok een groote Tall an Minschen, de veel Tied opwennt, wieldat se Hölpen wüllt. Man dor kippt dat ok hier und dor- de Verwalten sünd nich Herr vun dat Heele und „regelt“ allens twei!

Niels

Print Friendly, PDF & Email

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.