Moin leeve Lüüd,

de Welt ward jümmer verdwarster. De Dschihadisten hebbt Toloop ut Europa as nich kloog. Jümmer mehr mooken sik op to düssen appeldwatschen Kram. Aver IS is nu in Kobane mit de Hölpte vun de Amis mit eere Bombers und düütsche Waffensysteme erstmol trüchdrängt woorn. Düütschland hett de Peschmerga-Kurden  beleepert. De künnt nu mit twee lütte Raketensysteme hunnerttwintig Kilometers Grenz afsickern. Jungedi, dat´s mol een Hölp! Und föfftig Lüüd hebbt se no Düütschland holt, üm se uttobillen in dat Krieg speelen(Woneem nehmt se eentlich de Sickerheet her, dat dor nich ok wölk vun de PKK twüschenmogelt wöörn? De Peschmergas mooken doch gemeinsame Sook mit düsse „Terrorbrööder“!). Of de föfftig Suldoten wohl alltohop wedder trüch fohrt sünd!? Nich, dat dor wölk vun utbüxt sünd und bi uns noch Asyl hebben wüllt. Geiht jo gorni! Wo doch de schwatte Minister vun de Penunzen för´t tokamen Johr een „schwatte Null“ hebben will. Op Gedeih und Verdarv! He lett nich mit sik snacken. För so´n unnützen Kram as Hölp för anner Minschen givt dat nix! Basta! (Ach ne, dat „Basta“ weer jo een annern.) Und denn kümmt noch Flinten-Uschi üm´t Eck und blarrt rüm, dat se een högeren Etat för de Suldoten bruukt. Stande pede! Nich, dat ok noch de letzt SAR-Hubschruuvmaschin nich mehr opstiegen kann! Und de Drohnen… de döcht nix, aver dor kunn man doch noch een beeten wieter an basteln, meent se. Aver de KiTa-Plätze för Suldotenkinner, dor mutt wat koomen. Ach bitte, bitte,Wolle… Dat ward wohl nix, Uschi. Hest di fien vun de strähnige Angie op een Afstellgleis setten looten. Hett se all lang ploont hat. De bit üm sik, aver man so vun achtern. De „König vun de Bajuwaren“ mookt dat dor jo anners. He lött siene „Thronfolger“ an de lange Lien, dormit se denkt, se hebbt wat to seggen. Und een Momang dorno ballert he se över de „Medien“ een mittenmang twüschen de Oogen. Und nu hett he noch een  Ass ut´n Maun holt – he droht se mit dat sik nochmol wedder to Wohl stellen! Een Schreckgespenst nich nur för Söder und Aigner! Denn sünd se weg vun Finster! –  Aver se künnt jo konvertieren und een niege, kotte  Karriere in Nahost mooken! Dumm Tüch vertellen künnt se tomindst allerbest! So bayrisch eben! Oha! To dumm. Fruunslüüd wüllt se jo nich… Denn mutt se wohl, also de Aigner, viellicht arbeiten goon!? In denn Friestaat sall de Wirtschaft doch brummen.

So, nu lett jüm nich argern-

bit to´n nächsten mol-

Niels