Leeve Lüüd,

de Welt geiht koppeister. De EU is nich een in`n Ümgang mit dat, wat dor elke Dag an de Scheed vun de eere Liddmaten loos is. In Michelland givt dat een „Willkamen“ op Düvel koom rut un dorbi hangt em de Bommelmütz heel scheef in´t Gesicht. Dor sünd nuch Lüüd, de dor nich inverstohn mit sünd, wo dat mookt ward. Un een Barg vun düsse Lüüd sitten ok in de Verwalten un Behörden – dor deent jo ok Börgers ut düsse Sellschapp und so is dor ok de lieke Snitt to finn as buten bi dat eenfach Volk. Dor kann wunnerbor sliekert un dwarsstüert warrn, dormit de Hölp nich so löppt as dat möglich weer. Und ok wenn´t nich ut dat politisch  Dinken rut passeert, so givt dat doch een Steekclock, de denn de fixe Hölp minn mooken deit. „Oha, al Klock dree! Ik mutt noch mien XXL-Priesknaller vun LIDL hooln. Dor mütten de Lüüd op Flucht woll bit morn tööven. Ik heff se jo ok nich inlaad. Un ehr dat nix mehr geven deit, fohr ik gau hen!“.  Un wenn se denn in eer Kerntiet doch in´Aktenstöff sitten mööt, denn mookt se de Hölp vun dat Volk noch swor, wieldat se op dat Inhooln vun scharp Regelwark bestoohn doot. Un de Politikers sabbelt un sabbelt un maarkt nich, dat dor wat scheef löppt. Un de Ungar erst un de Öösterrieker! Wat geiht blots in de eer Dassels vör sik? Afschotten, afwiern un Traangas tegen de Lüüd , de jüstemang vör Doot un Verdarwen ut eer Heimat utneiht sünd. Un in Syrien sett sik de Zarewitsch bi Assad op´n Schooß un hett een Bült Ballerspeeltüg dorbi. Dormit de Strom vun Minschen, de Toflucht in Europa sööken ok ninich afrieten deit. So ward Politik mookt, leeve Lüüd. De snaaksche Europa mag nich mehr mit Wladimir speelen, denn speelt he even mit us. Un kümmt to liggen op sien Chäselong un höögt sik een. Europa hett he de Frisur mächti dörcheneen bröcht. De Wiesfingers vun enkelt Länner wiesen in alle Richten, de mersten op Düütschland.

Un nu kümmt ok noch de Katalaan un will sik vun de spaansche Zentaralregeern aflöösen. Denn ward dat noch een grötter Pleegfall!-  Wokeen nu!?