Leeve Lüüd,

´n poor Weeken heff ik ja nu mien Schnut  holen – wat de groote Politik angeiht. Avers nu will ik mien Semp mol wedder dorto kleien – nich dat Doon vun Zarewitsch Wladimir und de Eierige Union. Und de Kalifat-Staat- Dösköppe, de morden und metzeln noch gruulicher und kreegen doch jümmer mehr Toloop. Nu hett de Ami jo de ersten Bomben op se schmeeten. Ward dat dorvun beeter!? Wat löppt nur verkehrt in düsse, unse, Welt!? Dat is all mehr as veel!

Doröber viellicht bi´it nächste Mol. Dütmol is wedder de Landespolitik an de Reeg. Erst de Sassen, nu de Thüringer und Brandenborg. De Liberalen sünd vun dree wietere politische Landkorten wegradiert woorn – se stüert mit Vulldamp op eer End to. Dat duert nich mehr lang, dorvun bün ik meist öbertüügt. Und de Ole Tant!? – De mookt ok jümmer weniger een goode Figur. Good, in Muttis Heimat hebbt se sogor dortowunnen, avers wat is denn in Thüringen losween?!?!? Dat slechteste Ergevnis siet se dor nich mehr de Einheitspartei to Wählen hebbt. Wenn Bundes-Siegmar so wieter mookt, ward he ok noch dat Verschwinden vun de groote Volkspartei ut so manch een Landdagg bewunnern künnen. He hett jo avers een nich to öbersehendet dicket Fell und so wiet ik weet, is he keen Fallschirmhüpper. He ward sik wohl ok nich mit´n Paraplü vun Schapp fulln  looten, wenn he nich mehr wieter weet. Wöör wohl ok keene Meldung op de erste Siet afgeben…

De mit de Sünnenbloom dümpelt dor allewegens bi knapp öber de Ruutschmietgrenz rüm – kannst nix mit berieten, avers man is dorbi. Und nu sünd se sogor utkeeken worrn, viellicht doch dat Tünglein an de Woog to ween – se künnt jo mit dorto bidreegen, dat dat denn ersten Minister vun de Linken geben wörr. Vör allen Dingen weer dat denn avers een richtige Slagg in´t Kontor vun de Schwatten – Stell di mol vör, Rot-Rot und Rot-Rot-Grön – da wörrn se schön in de Röhr kieken. Und dat weer een Teeken, dat in eene Demokratie allens möglich is, of de Bundeskanzler dat nu lien magg oder nich. Dor hölpt ok dat Bedrohen und Warnen vun annere Parteien nix, as de Merkel dat nu jo to´n Utdruck bröcht hett. Dor bruuken se ok nich üm de Eck komen vun wegen dat weer nich Volkes Wille. Mol afsehen dorvun, dat düsse Wille denn sowieso nich mehr tellt – de annern hebbt doch een grooten Deel Stimmen  afkreegen und düsse Wähler hörn doch ok to´n Volk, oder sünd se eer nich genehm!? Se kann ja mit de annern Schwatten oder schwatt-brunen, ach nee, de hebbt sik jo blau utsöcht, tosomen gahn – denn hett se erst watt anricht! Avers ok dat is Demokratie, givt jo jümmers wölk, de de Nees vun de annern nie passen deit!

Se mööten sik jo all Gedanken mooken, wat denn dor mit de „Alternative“ wohl los is – öberall sünd se an Wähler afgriepen, leider ok, so steiht dat jo in groote Wochengazetten, in een farviget Ümfeld, dat man in Flora und Fauna oftens andreepen deit, in düssen Fall wohl eher de Darmflora.

Avers man to –

„Feste Jungs, macht nur weiter so, ihr bekommt schon alles kaputt“ hett Robert Long vör veele Johrn mol  sungen…. und wenn dat de Demokratie is!

So, Michel und nu: Wieter sloopen!

Bit to´n nächsten Mol –

Niels