Verleden Maand hebbt se de Grootkupperten noch de lange Nees wiest – nu is för de EU meist allens wedder op de Reeg. De Griech is inknickt. Dat groote Geld hett de Linke wiest, wo de Hammer hangen deit. Und so is allens trecht. Merkel bruukt erstmol nich mehr bang ween, dat ehr Schicksal mit de Aftrünnigen verknüppt ward. De greeksch Koh kann nu wieter molken warrn, üm de Banken to woohrn. Se kriggt nieget Geld, üm ole Schullenlöcker to stoppen und fohrt so jümmer wieter in denn Schiet. Dat kann nich good gahn, op Duer nich. Und de annern „Schullenstaaten“, de vun de „Union“ so giern as lüchten Bispill anföhrt warrn!? De Iren und de Spaniers!? Geiht se dat so good, as de Kassenbasen de Lüüd in Europa jümmers vertelln doot? Vundag stünn dat to lesen – de Talln wiesen wat anners, wenn keen dor nipp un nau hinkieken deit… Allens ward ümverdeelt – fröher geev dat mol de Liekedeeler – hüüt givt dat twee Oarten – de een ward jümmer mastiger und de anner is as de knooken Finger vun Hänsel – eentlich al doot. De ole Hex in´t Märken will em liekers opfreeten und utsuugen, wat geiht. Jüst so is dat mit Europa. Se hebbt eer Melkkööh, de se utsuckeln künnt, bit se nich mehr künnt. De een nich, wiel se beet sünd, de anner nich mehr, wiel bi dat heele Suugen een groote Ques wussen is, de opletzt mit een Knall platzen ward. Und denn ward se doch noch „entlooten“ ut de „Gemeenschapspenunz“. Süllt se doch eer Drachme wedder hebben, de olen Griechen! Aver vörher noch gau utplünnern, nich dat dor noch wat is, wat bi de Nieanfang stöörn kunn! Denn is doch good, dat Österriek nu de greeksche Bahn övernehm´will – und se sünd woll echte Frünn – se wüllt nix dorför betohln! Dat is de woohre Gemeenschapp! Dor finnen sik denn bestimmt ok noch wölk, de as Utgliek för dat Geld, dat se ut de leddigen Kassen nich mehr rutkratzen künnt, de verbleeven Warken und Maschins afbuuht und in eer Riek hoolt. Avers viellicht kümmt ok allens anners. De Chines brennt siet Weeken een Barg Geld an de Börs. Duert nich mehr lang, denn wart riek Europa dat ok marken!
