Leeve Lüüd,
dat is ja woll een verdwarste Sommertied, is´t nich!? – Jümmers so een Slingerkurs mit dat Wedder, dat keen gor ni richti planen kann.
Aver dor nützt keen Zackereern und Muultrecken, dat Wedder hett ja ok siene scheun´Sieten. Mit jümmers mol wedder een Wedder mit Rummel und dat Natt vun baben mutt de Goarn nich so faken gooten warn. Blots de Rasen, de mutt denn een twee Mol tosätzlich meiht warn, aver dat kricht wi woll sachs noch hin, of ni!?
Nu sind al de Ferien wedder vörbi un de Göörn mütt wedder to School. Is ok sachs een beten komisch, finn ik. Wi hebbt de Hochsommer noch ni tofoot un dat tokamen Schooljohr fangt al wedder an und is denn ja heel lang – sotoseggen mol een echt Halvjohr, denn toend is ja erst an End vun Jannermand. Da ward de Schoolmeisters nich minn blarrn und quesen as de Schöölers, wieldat dat sooo een Schinneree is.
An Blarrn und Quesen sünd se ok in Barnsen un ümrüm. Dat givt een Ännern vun de Buuplan för de Flugplatz und dor hett sik denn glieks een Tegenvolk utbilt, as dat faken so is. Twee vun de Baasgrupp koomt woll ok ut Barnsen, man de anner foffti Perzent sünd ut anner Dörpen. Dor harr ik meist de Indruck, dat se wedder een niege Speelwisch bruuken deen. In anner Saken hebbt se sachs nix to quesen funn und so givt se se eer Hartbloot nu för de „Antis“ in Barnsen. Deelwies kann ik dat ja novulltrekken, man dat, wat bi so een Veranstalten hangenbleev, weer eentli blots, dat se tegen de Gemeen scheeten wulln. De ole Hoot vun de „leege Information“, de de Verwalten to de Börgers geven deit, hebbt se jümmers noch op se eer griese Köpp sitten.
Also, stell ik för mi fast (und dat weer nich blots mien Indruck bi düsse „Info-Veranstalten“), dor hett sik nix ännert, veel Gequees und kümmt nix bi rüm. Aver elkeen bruukt sien Hobby, seggt keen ja.
Denn geevt ja ok noch Lüüdsnack vun een niege Partei, de een poor Lüüd grünn´wulln – „WIR für(…)“ sulln se sik nömen. Beter wöör woll passen, wenn se „WIR tegen Allns“ heeten wöörn. Aver ik glööv, wenn denn nu wat doran is, dat se nix berieten künnt. Vör Tieden döff de Hofnarr ja ok jümmers dat Muul opmaken, man to seggen harr he liekers nix! – Ik bünn al neescheerig op de Kommunalwahl an ölbent vun Septembermaand, of dor wat nieget in de „Parteienlandschapp“ to bekieken is. Of dat woll Lüüd geven ward, de sik för de sonömten „Blauen“ – de AfD – opstellen looten hebbt!? In poor Weeken sünd wi klöker!
Bit dorhin lett jüm ni argern!
Niels
P.S.: An de letzt Sünndag vun Augustmaand is wedder plattdüütsch Gottsdeenst in Eimk! Klock dree geiht los! Besinnt jüm op Gott un höögt jüm över us Heimatspraak – dat Plattdüütsche!
