Moin leeve Lüüd,

nülichst weer ik mol wedder in so een Drogeriemarkt. Wi brukten so düt un dat und vör allen weer wedder mol een nieges Deo nötig. Ik keek denn so dörch de Regalreeg und mien Oog bleev an een Buddel hangen op de „stress protect“ stünn – „Nu kann all een Deo di vör de Unbillen vun Dagg hölpen, nich nur vör Schweetgeruch“, dach ik to mi – „dat muttst du di doch mol neger bekieken!“ Ik nehm also so een Doos ut Regal und… kunn nix besonndert finnen – de glieke Schiet as in all dat anner Tüch ok… Avers viellicht is dat jo doch wat ganz dullet? – Also mitnehmen, utprobeern und uttesten, wat an dütt Verspreken wohl an is – man dieselt sik in und keeneen Stress kann een mehr wat andoon – dat is ja schon meist sowat as de eierleggende Wullmelksööch!!! –

Ik har dat Wunnermiddel all fast in mien Korv as ik noch eenmol op de Priesschiller keek – und  de Stresshormone scheeten mi dörch denn ganzen Liev, as ik seeg, wat dat Schiet kusten sall!!! Ik dat Ding furz wedder ut´n Korv rut und trüch in´t Regal – Puh!- Nu har ik „stress protect“ för lau und heff denn ganz entspannt miene „Husmarke“ inpackt!

Stress givt dat ok in Soken „Y-Trasse“. Man dat dat all een grootet Aflenkungsmanöver vun de schwatte Garde is, dat schient keeneen to marken, de spannt dor de Dörpslüüd vör eern Korrn, dor kann man sik nur wunnern. Vunjoohrn hebbt eben düsse Schwatten noch verkündet, dat wi bi uns keen Tourismus brukt und de Ümwelt hett eben Pech, denn de Wirtschaft hett Vörrang (de Wirtschaft mit de Grootställe und de Anbu vun Mais und Mais und nochmehr Mais – dat ganze Roundup-Programm eben).

Und hüüt, wo de Bahn de Varianten för niege Trassen vörstellt und een dorvun dörch dat Jagdgebiet, ach nee, dörch de „Naherholung“ und an eere Hüüsen vörbifööhrt, dor holt se genau düsse „Argumente“, nur ümdreiht, ut de Tasch und sabbelt vun „Zerschneidung vun Naturlandschaften und Naturzerstörung“ – und de Tourismus is op eenmol een ganz wichtige Wirtschaftstwieg, de man doch üm keenen Pries zerstören döff! Ok de Landtagsafgeordnete bloost mächtig in dat Horn! Dor is de Larmschutz vun de Dörpen an de Streck plötzlich ganz boben op de List!!! Und ohne na Luft to schnappen verkünnen düsse Demokraten, dat dat nu aver Tied ward de Autobahn 39 vörantodrieben… Markst Müüs!? De Landrat hett ja sogar verkündet, dat de Lüüd in unse Region düsse Autobahn wüllt! Mi hett he nich froogt!? -Juu!?

Und in Bämsen will de CDU de Resulotion gegen de A39 ännern und de schwattsure IHK  weer in Kries op „Werbetour“ för düsse erheblich gröttere Naturzerstörung. Oder wüllt se de Stroot an Siemens Lufthaken opbammeln!?

Dor denkt man mol öber no,
avers ansonsten lett jüm nich argern –

Bit to´n nächsten Mol

Niels

Ach so, een heff ik noch – ik heff dat „Lexikon Platt-Hochdütsch“ wedder instellt, wiel mi seggt worden is, dat dat nich de richtigen Wöör weern, de ik verkloort heff. Ik kann jo nur vermoon, wat sall ik sunst doon!? Also mööt jii mi in Tokunft wedder direkt froogen, wenn een Wort nich to verstohn is…

Viellicht kannst mi ja an 25.09. froogen. Dor bün ik „live“ bi denn Treffpunkt Buch in Soborg! Avends Klock söben! Bit denn!