Nülichst weer ik mol wedder Loopen. Dat weer schon meist düster und in mien Dörp gifft dat nich so veele Straaten und Latüchten, dat sik dor een lohnenswerte Rünn vun mooken lett – also bün ik rut ut Dörp, an Massenhöhnerstall vörbi över de Feldwege . Dat weer´n beeten an Bloosen, avers drööch und de Maand geev nuch Licht, ik kunn de meiste Tiet miene Handlamp utlooten. Erst bi de „Wenn“ , as ik in´t nächste Dörp op de Stroot wedder denn Trüchwegg leep, dor weer de Lamp för mien Sickerheit denn anseggt.Har ik mi tomindst dacht… Trotz de Lamp und all de Reflektoren an de Klamotten, liekers hebbt een Barg vun de Autofohrers dat nich för nötig holen, dat Blendlicht uttoknipsen. Oder se hebbt kott afblend und denn avers, bevör se vörbi weern, wedder dat Licht op Luut dreiht. Ik har denn eenen oder annern Titel för düsse Morsbacken to vergeben, dat kann ik jüm flüstern… Een Autofohrer , de „vun achtern“ keem, fohrte langsamer und reep to mi röber, dat dat wohl keene goode Idee is in Düstern an de Straat rümtoloopen. Ik bün doch to sehn, heff ik em antert, avers ik glöv meist, he weer gor ni Bang üm mien Befinnen, nee, he wull to´n Utdruck bringen, dat mit dat Düsterwarrn de Stroot nur noch de Blechkisten hört, dor hett keen anner wat to söken! Wenn man sik dat „Strootenverkehrsrecht“ bekieken deit, mut avers ok de gnaddeligste Asphaltheld insehen, dat de Stroot em nich alleen towiest is. He mutt sik ok op Footgängers und Radfohrers instellen, ok wenn he dat nich lieden magg. Int echte Leven is dat ja nu een Twee-Klassen-Gesellschaft, dat kann man jedeen Dagg feststellen und besonners in Düstern. Ohne Blechkleed tellst Du nix op de Stroot. Und wat nützt dat Recht, wenn düsse Röbenswiene di vun de Stroot scheeten!?
Ik loot mi liekers nich argern – Niels
Latüchten – Laternen liekers – dennoch
an Bloosen – es wehte ein stärkerer Wind … dat Licht op Luud dreiht – hier: Fernlicht eingeschaltet
Wenn – Wende
