Leeve Lüüd,

een mutt ik noch loswarrn –  ik bün een ganz eischen Kerl. Ja, würklich! Woso!? –  Een Spökenkieker, de achter elk een Boom steiht und wohl as de NSA in de Breegen vun alle Lüüd kieken kann, de „gegen em“ sünd (und dat sünd no em een ganzen Dutt!), hett sik gistern een ganz dulle Geschicht utspekuliert. Op een olen Artikel to´n Blootspennen heff ik een Kommentar kreegen und dorop- ok as Kommentar- antert. Aver de Spökenkieker-NSA-achtern Boom-Tööver, de allens beluert, de hett dat dörchschaut! – Dat is vun lange Hand utbaldowert worrn, üm de eenzig wichtigen Botschaften, also siene spökigen „Das Böse ist immer und überall“-Phrasen vun Platz een in de Kommentarliest to verdrängen! Und dat heff ik nich alleen in mien Breegen torechtklabüstert – nee, dat is allens geheemnisvull afmookt woorn, dormit de fiesen Machenschaften  vun  de Politik no achtern rückt warrn. So eisch! –

So eisch… is dat nich, leeve Lüüd. Ik heff mi ok wunnert, dat op so een ole Geschicht noch een Kommentar kümmt. Aver dat wiest jo, dat op de Sieten ok rümstöbert wart, as de Chef vun´t Ganze totreffend faststellt hett. Und denn ward dor een Verschwörungsthorie as in Küllen Krieg ut mookt. Jungedi – dat´s starken Tobak! Aver för veele Lüüd nur een wietern Buusteen in dat „künstlerische Gesamtwark“ vun denn Spökenkieker, de nu noch weniger Lüüd för vull neehmen warrn. Begriepst dat!?

Een noch to´n Sluß und eernsthaftig, leeve Lüüd: Ik wöör dat würklich bannig good finnen, wenn heel veele vun ju Kommentare to de Artikel afgeeven. So sünd dat jo man nur  een Hand  vull , de sik utlötten. Und ik dräng mi dor ok noch twüschen. Nee, so wat!

So, een mag sik, de annern lötten sik nich argern.

NT

Niels