Leeve Lüüd,
an de achte Dag vun de Nevelmaand leeten de Bööm de Köpp hangen. De düütsche Politik weer sik ni eens, för de Umweltgipfel in Marakkesch kunnen se sik nich tohooprieten un de Siggi hett Inspruch för de Kohlelobby inleggt. Dat weer een groote Last för de Natur. In Amerika is Donald (Dagobert weer passiger) Trump de niege Baas woorn. Denn brooken de Telgen. Dat weer toveel. Een Barg Bööm sünd twei gahn, se ehr Last is denn aver smolten un se hebbt sik tomeist wedder opricht. Kann Düütschland nu noch oprecht in de Ümwelt kieken!? Wo se as Vörreiter nu so inknickt sünd!? Und mag sik Amerika oprichten!? – Dor heff ik keen Twiefel an, grootmuulig weern se ja allerwegens! Blots wat dor nu ut ward, dat ward sachs nich scheun… Aver he hett ja ok Beraters, de em soufleeren wat good is un wat nich. Dor ward he schon op höörn – wenn he se nich vörher na Erdogan-Oart afsett hett… De Osmanenfürst schafft ja to Tiet een goode Basis för sien „slanke Staat“. Denn sünd ja al twee tohoop, de de niege Welt utroopen- so, as se se sik dat vörstellen doot. Un de anner Kaptein mit de Bärenmütz op de Kopp? De höllt still un töövt af, wat se em denn in de Arms rennt. Un wenn he se denn erstmol bi sik op de Schooß hett, lett he se ok ninich wedder loos, dat glöövst wohl, of nich!?
De Neevelmaand is wat düster, kold un natt. In düsse Maand blieven de mersten Lüüd doot, seggt de Lüüd. Un dor hebbt se de, de in er Bregen al lang keen Leeven mehr hebbt, noch gorni mittellt! Nülichst is mi so een heel opsternaatschen Kerl in de Mööt kamen. He föhr sik op as de Marschall Matt Dillon ut Rauchende Colts (künnt se sik op em besinnen?). He scheet scharp un meen, dat sien swatte West em woll as de Spreeker vun´t Dörp utwiesen dee. Man ik heff em glööv ik sien Schimp heel good utkontert un em ut´n Sattel stött. As Kinner hebbt wi „DbddhkP“seggt und dat is wohl in düsse Fall liek so as dat bi de grooten Spinners, also de, de (leider)würkli wat to seggen hebbt (s.b. – „süh baben“), de Fall is.
De Nevelmaand hett ja man ok een goodet End. Denn de Adventstiet fangt an. Un dorop sült wi us högen – us besinnen dorop, dat wi de narrsche Welt mit sien bregenklööterige Lüüd nich bewohren künnt, man us doch inbringen un een beeten wat bidreegen, dormit dat nich noch leeger ward. Un de Verdwarsten jümmer wedder de Hann rieken – sachs griepen se een Dag to!? Un dorbi ok doröver nasimmeleern, dat een sülm ok sachs mol de Sturkopp is.
In düssen Sinn-
lett jüm nich argern, geneet de Wienachtstiet und kaamt good in dat tokamen Johr!
Niels
P.S. Un vergeet nich de Petitschoon to teeknen! http://www. suderburg-online.de/erhaltung-des-instituts-fuer-niederdeutsche-sprache-ins/
Bit to´n 17. vun Dezembermaand is noch Tiet!
