Leve Lüüd,
Johr üm Johr hebbt se us vertellt, dat de Düütschen utstarven. De Lüüd hebbt nich nuch Göörn in de verdwarste Welt sett un en School na de anner is dicht maakt worn. Un de Schoolen, de noch dor sünd, sünd meist en Fall för de Afrissbirn. De Bund hett de Last op de Länner un de wedder op de Kommuun legt. De hebbt avers all keen Geld un so geiht de heele Billen in dutt. De Swatten, de de heele Mess in ehr Tiet vertappt hebbt, schimpt nu rüm, dat de „Ünnerrichtsversorgen“ slecht is. Da mag ja hier un dor ok ween, man dat liggt ja nich doran, dat de Regeern vun de Länner dat nich ännern wüllt. Ne, dat givt nich nuch vun de Lüüd, de noch Schoolmeesters warrn wüllt. Oder künnt. Denn dat System is to verdwarst, ümdat keen „eenfach so“ dat studeern kunn, wat een toseggt. Nee, du muttst denn ok dat richtige tofaat kreegen. Hest in een Fack een Studeerflack kreegen, heet dat lang noch nich, dat dat losgaahn kann. Denn in dat tweete Fack hest sachs een Numerus clausus för de Nees. Un wenn denn de Snitt nich stimmen deit, kiekst in de Röhr. Hett sik wat mit Schoolmeester ween. Denn also doch för BWL inschrieven…
Un nu ward richti leeg. Sachs hebbt jii al dorvun höört – de niegsten Studien wiest, dat dat een Schölerswemm geven ward! Se mütt niege Schoolen buun un de olen Ruinen grötter maken! Keen sall dat betahlen!? Wo se doch jüst 130 Millionen för de Gröttsten twintig Welttweimakers mit ehrn dusendfachen Hofstaat utgeven hebbt! Wat hebbt se beslaten? Nix. Blots, wo se Afrika noch beter utpressen künnt un mit fadenschienig Projekten dat Göld na Europa holen künnt, dor sünd se wieter kamen. Klimawannel? Schiet op. De Lobby mutt bedeent warrn! Menschenrechte? Wat geiht se dat an! De Euro mutt rullen! Dor kann keeneen op en paar Millionen Minschen achten of sik sogar üm de Deerten un Planten scheern! Hauptsaak good äten un drunken, fien Musik toluustert un dat Volk buten laten! Un achterno grient se in de Kameras ,twittert un vertellt, wat se doch allens för dat Retten vun de Welt daan hebbt! Nu bün ik en beten afkamen… maakt mi aver ok rein wild, wat se dor mit dat Volk anstellt… Wat wull ik vertellen? – Achso, ja, de Billen vun de tokümstigen Lemmings, de Michels, de de Slapmütz so deep över de Oogen trocken worrn is, dat he jümmer minner mitkreegen deit, wat se mit em maakt – dor föddert se en beter Ünnerrichtsversorgen. Lehrers mütt pädagogisch ünnerstütt warrn, wieldat se de grusige Tostand vun de Kinnings nich alleen schafft – de Öllern sünd jümmer mehr nich in de Laag, de Nawuss blots de Grundlagen vun Sellschapp bitobögen usw, usw. Man blots eenfach mit Dalers (de doch veel beter in dat Oprüsten un Utbeuten investieert sünd!!!) is´t nich daan. Denn dat mutt ja so justeert warrn, dat dat ole System vun „Brot un Speel“ nich kippen deit – blots so veel Billen, dat de Bobersten de Macht sickern künnt. Vör de Wahl künnt se nich luut nuch trumpeten, wo wichti de Billen för all Schichten is. „Keeneen döff verloorn gahn!“ krakeelt se of lött dat över willige Schrievers in de Dagblee setten! Doch wat weer, wenn all, würkli all, dat System verstahn wörrn!? Denn geev dat een Scheeplaag, de de Göldkast sicker nich lien mag. Dat Volk dumm hooln is denn doch beter! Un dorüm passert ja ok nich würkli wat in Saaken Billen! Dat is doch de wahre Demokratie! Un dat se all richti maakt seeht wi all veer Jaahr wedder, wenn sogar de „eenfachen Lüüd“ dat Kapital wähln doot, ofschoonst se sik de egen Ast afsaagt, op de se sitten! Mit mehr Schölers lött sik de Dösigkeit noch beter stüern! Denn de sünd ja de Wählers vun de tokamen Tieden!
`n beten bang is mi –
Bit September is nich mehr lang – jii künnt sik aver noch besinnen!
