Dag ok leeve Lüüd,

mien neegste Vehikel is een Toyota. Woneem? – Nu, dat is heel eenfach vertellt. Ik heff leest, dat de Inschenöörs bi de Japaners utprobeern doot, wat se de Lüüd dorvun afhooln künnt blangen dat Foohrn mit dat Smartphone rümtotüdeln. Un as Lohn för dat Uthooln kricht se Koffi! Is dat nich scheun!?  – De hebbt nu een App mookt, de över Dschi-Pi-Es doröver wachen deit, dat de Minsch, de an Stüer sitt, nich an sien Sabbelknoken bigeiht. Un hett he denn hunnert Kilometers dörchhooln, kricht he een „Online-Goodschien“ för een Tass Koffi op sien Smartphone sennt. Un dorno all tweehunnert Kilometers. Blots för dat nich Kieken! Is doch eenfach verdeente Koffi, is´t nich!? Jammerschaad blots för een, wenn dat denn so een Pingelton givt op dat du meenst, dat nu de Koffi verdeent is un dat is denn Dien Sööte, de neescheerig is, wannehr Du denn nu bi Hus ankümmst un Du büst liek bi Kilometer 99 ankamen…

Anners fallt mi in, dat ik kuum op hunnert Kilometers in een Tour kamen do…Denn kann ik mi ok meist keeneen Koffi tohoop foohrn. Ik will woll leever de Fingers vun de Japaner laaten – mien lütte Opel deit sien Deenst un de Koffi smeckt tohus liekers best!

Lett jüm nich argern –

Niels