Dörpstrottel !?

Vundags harrn wi mol wedder een Belevnis biet Flaneeren. Ik weer so mit mien Sööte op een Wegg in’n Holt ünnerwegens, as uns een olen Knacker in de Mööt keem. He  har so wat as Sporttüch an und siene Bewegungen sullen wohl wat anneret as Gohn dorstellen. Viellicht weer he an Joggen!? – Nu –  he schleppte sik neger an uns ran und as he kott vör uns weer, keem denn op eenmol Leven in sien Liev: He mookte eenen Utfallschritt, wieste as John Travolta in siene Danzfilme mit een Ruff in unse Richtung und reep: „HAA!!!“. Denn stolperte he furts wieter, sabbelte noch een betten Kauderwelsch und fung denn wedder mit sien Schleppgang-Loopen an.

Wi hebbt uns toerst för een lütten Momang verfeert- man weet jo nich, wat in so’n Wackelkopp vörgeiht – kann jo ok een groote Gresigkeit dorut warn. Keen kann dat schon weeten!? – Avers denn hebbt wi uns doch wedder köstlich amüseert.De lieke ole Kerl sorgt ok jümmer wedder för Plaisir, wenn ik to’n Bispill op’n Hoff an Holtmooken bün. He ünnermolt dat Holtklöben schon mol mit een Leed -„Wir sind die lustigen Holzhackerbuam!“ givt he schon mol to’n Besten, wenn he op sien Spekulierrünn op’n Wegg langschliekert. – Bruuk ik gor keen Radio anmooken!

Fröher geev dat jo in jedeen Dörp denn Dörpstrottel und de Tieden ännert sik –  seggt man; männig Sooken blieven avers ok bestohn. So as dat wohl ok in denn Ümgang, oder beeter, mit dat Erdulden vun de Oart vun denn eenen oder annern Postendräger is. Dor steiht een Minsch vör de Versammlung und vertellt männig Sooken und nimmt sik rut Lüüd to verurdeelen, wiel em dat grod passen deit. Dat gefallt ’n Barg Lüüd ut’n Auditorium nich. Avers, wenn man se dorop anschnackt, antert se: „Dat nehmt wi so hin. – Wi sünd jo froh, dat düsse Person dat mookt. Nümbs sall dann sünst mooken!?“

Und dorüm kann so een Minsch denn ok schalten und walten as dull und meent ok noch, he hett de Wiesheit und Allmacht (in Dörp) mit’n grooten Löbel freeten. Wenn denn mol keen wat antomarken hett, givt dat ok noch’n Opschrei, wat dat denn för een Ungehörigkeit wesen is! So geiht dat nich! – Du kannst doch ni…! – Du muttst mi vörher frogen! – Dat mutt ik friegeben! -…

Avers dor kümmt de Dagg…
– und bit dorhin looten wi uns nich argern!

Bit to’n nächsten Mol
Niels

 

Lexikon:
Flaneeren – Spazierengehen
Sööte – Süße, Liebste
in de Mööt komen – begegnen
Ruff – ruckartige Bewegung
furts -gleich                                                                                                                                                                              Gresigkeit   – Gefährlichkeit /gefährliche Situation                                                                                                          Kauderwelsch – unverständliches Gerede
Holtklöben – Holzhacken
as dull – wi verrückt (hier: wie er/sie/es es für richtig hält)

 

 

 

Schreibe einen Kommentar

Diese Seite verwendet Akismet, um Spam zu reduzieren. Erfahre, wie deine Kommentardaten verarbeitet werden..