Deit dat not!?

PlattsnackerABMoin leeve Lüüd,

Nülichst stünn in dat Dagblatt to lesen, dat de Wachtmeisters in Hessen een Motorradfohrer een Bußgeld verpasst hebbt, wiel he „unnötig hen-und herfoohrt“ is. Tja, heff ik so dacht, wenn se dat jümmers dörchsetten wüllt, hebbt se´n Barg to doon. Woveele Lüüd foohrt Dag för Dag mit Auto de Görn to School, ofschon se nur een poor Meters dorvun af wohnt!? Woveele Lüüd foohrt mit´n Auto an Sünndagmorn to´n Brötchenholn, ofschon se üm´t Eck eer Hus hebbt!? Oder se holt mit Auto de Zigaretten – dat´s glieks doppelt unnötig!! In´n Alldag givt dat mennig Sooken, de nich not doon – und sünst!? Wat is in anner Bereeke!? -Dat Tosomenperchen vun Dierten op engsten Room – deit dat not? Nee; ward liekers  mookt! Dat Wegplöögen vun Ackerrandstriepen- ut Buernsicht deit wohl not! Wöörn se sunst jo nich mooken…Avers dat is und blivt Deefstahl – Landroof vun de Kommunen! Und de wedder meent, dat deit nich not, dorgegen antogohn. Wenn dat een Hinwies givt, sall de Börger de Bewiese bringen und sik op de Söök no de Grenzsteen mooken! Verdwarste Welt! Mütten de Lüüd ut de Verwaltung nich dorför sorgen, dat dat Allgemeengoot ok Allgemeengoot blivt!? Ik meen, dat deit not! Dat se de Bahnschienen dörch dat Land buun wüllt, üm een poor Minuten fixer vun A no B to koomen – unnötig! Dat se denn „Lückenschluss“ vun de A39 buun wüllt -deit so not as de Y-Trassen. Komisch nur, dat mennig Lüüd vun de Y-Trassen-Gegners de Autobohn wüllt! Stell di dat mol vör – een groote runde Opklever mit dörchstreeken Bahnschiene und direktemang dorbi (viellicht op de anner Siet vun Kufferruumdeckel) de „Pro A39“-Opklever op´t Auto!  Und de Lüüd to düsse Autos meent, is jo klor, dat deit not! Is dat nich´n beeten mall!?

Und denn givt dat noch de Lüüd, de anner vör eern Karrn spannt, wiel se sülm nix bewegt hebbt oder kreegen oder se sünd in de Öffentlichkeit al verbrennt und eer Wort tellt nix mehr…Dat düsse annern no een Tied spitzkreegen, dat se op düssen Irrwegg mit eer Ansehen speelt, deit not. Dat se denn eer wietere Hölp verseggen, deit ok not. Dat passt de Stinksteebeln und Wadenbieter nich und dann fangt se an, de „Aftrünnigen“ madig to mooken und versöken se mit breegenklüterige „Kommentare“ slecht to mooken. Dat deit nich not. Se warrn eer Quittung noch kreegen, dor bün ik sicker…

Ok in´t Dagblatt, nur vun een annern Dag, heff ik een Överschrift leest, de hett mi erst een beeten Moot mookt – „Das Ende der Zinswirtschaft“ stünn dor to leesen! Dat´s jo mol dull, heff ik dacht, dor breekt keen een Lanz för dat Beennen vun uns rottet Wirtschaftssystem – endlich peert dor een för in, dat de Scheer twüschen Arm und Riek nich noch grötter ward. Endlich sall dat toend ween mit dat Steigern vun denn Wasstum Johr vör Johr. Dat deit jo ok not! Avers denn keem dat Ernüchtern – doch wedder nur dat Geschwafel vun de „Rettung“ vun dat bestohende System. Und ik dacht al, dat dat nu ok in de Geldkaste ankoomen is…Hoffen döff man jo wohl, oder!?

So, nu lett jüm nich wieter argern

und denkt doran- Schiethupens mütten fix wegrüümt,  tomindst afdeckt warrn, sünst givt Arger! Markst Müüs!?

Niels

 

 

 

Print Friendly, PDF & Email

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.