Moin leeve Lüüd,

de verleden Medderweeken harrn wi een erste Indruck vun Sommer kreegen. Wat een  fienen Dag dat doch weer! Ik weer in Goarn an wurachten und dorbi heff ik mi scheun de Sünn op´n Dassel sengeln looten. `n beeten Klöör in´t Gesicht heff ik woll al kreegen, avers mi güng dat an tokamen Dag ok nich so good – mi weer heel dasselig tomoot und dat höll de heele Dag an. Weer woll´n beeten veel Sünn op eenmol! Har ik woll een lütten Sünnenstich…

Avers Lüüd, de geiht wedder weg. Anner Lüüd hebbt duerhaftig een an Kopp. Kannst jo jedeen Dag nolesen in de Dagblee oder ok in Internet. De groot Debatt üm denn Wulf to´n Bispill. Kuum een Dag, wo nich eener sien Semp dortogivt. De een schürt de Angst, de annern hebbt se. Se vergeeten dorbi, dat kuum een denn Isegrim to seh´n kriggt. Und de Jägerslüüd, de truu ik nich över´n Weg – dor givt dat toveele „Waidlüüd“, de eenfach nur scharp op een Afschuss sünd und sik denn de utstoppte Kopp vun denn Wulf an besten noch över´t Sofa hängen wüllt. Und denn givt dat jo ok noch de „Jägerslüüd“, de mit eere Blickkisten unfriwillig (?) de Dierten to Streck bringt. Twee sünd an de Stroot dootbleeven und denn hebbt se noch een Kadaver ut´n Beek trocken, stünn ok in´t Dagblatt. Wenn dat viellicht, und dat is woll meist´n beten hochgreepen, dreehunnert in dat heele Düütschland givt (Düütschland is 357 Dusend 340  Quadratkilometers groot!), denn hebbt se dor al een Perzent wedder utlöscht. Und de Dierten warrn jo ok mol old und blieven doot, wiel se, as de Mensch ok, een biologisch Klock hebbt. Und, dat liert man al in Sachkundeünnerricht in de Grundschool (fröher tomindst), dat geiht in de Natur jümmers no Angebot und Nofroog – givt dat veel Wild, givt dat veel Isegrim. Dat ward denn weniger, wenn de Spieskommer leddiger ward. Dat Problem is nich de Wulf, dat Problem is de Minsch – de mookt sik de Welt Ünnertan und wunnert sik, dat allens ut´n Ruder löppt. Is jo ok eenfacher, wat uttolöschen, wat stöörn deit. An´n End is he sülm an de Reeg. De mersten Lüüd mooken bi dat Utlöschen mit, sünner doröver notodenken. Se jammert und huult över een Schaap, dat kopeister gohn is, se nehmen avers in Koop, dat dusende Dierten Dag för Dag vun Minschen quält und pienigt ward. Dat is allens normal. Und denn givt dat jo noch de ganz kloogen Lüüd. De Hinwiese verdichten sik, dat Isegrim anfüttert ward. Denn mutt sik doch keeneen wunnern, wenn he nich bang för de Minschen is. Ik loop veel dörch de Natur und mi is  noch keen Isegrim in de Mööt koomen. Nich in Bargfeld und nich in Soborg. Nich an´n Dag und nich in Düstern.

In Düstern stooht jo ok de veelen BIs gegen de Y-Trassen und Bestandsstreekutbu. Se ward an de lange Lien dörch de Arena führt. Informationen givt dat nich oder wenig. Wat se wüllt ward nich inhooln. Avers allens op Oogenhööchte – is klor! Ik drück ju de Duums, dat de Düütsche Bahn und de Agentur vom Hoff und keen dor noch so an rümdoktern is, ju nich blots för dumm verköfft. Ik find jo dat androhen to scheun, dat een vun de BI seggt hett, se wüllt dat Forum verlooten. Und denn!? Meent jii würklich, dat se dat nich to pass kümmt, wenn de Stänkerlüüd ut´n Volk  muksch sünd und tohus blieven!? Denn man to…

So, bit to´n nächsten Mol

und lett jüm nich argern…

Niels