Leve Lüüd,

nu is dat also ween, dat Afmööhn un denn Bangen, wat woll de Neddersassen-Michel anstellt hett mit sien Land.

Een lütte Troostbonsche vörweg – de AfD is jüst even so in de Landtag rutscht, vörbirutscht har mi beter fulln, man so is dat ok al en lütte Slag in´t Kontor för düsse verdwarsten Minschen. Veele Lüüd sünd schients wedder op en lütte sozialdemokraatsche Weg. Dat finn ik per se al wiss mal good. Blööd, dat se nu nich so licht en Mehrheit tohoop kriegen künnt. Twee Sitten fehlt för rot-grön. Mutt also en drütte lüttje Vagel mit dorbi ween. Doch de geelen Wendehälse tiert sik. Ampel wüllt se üm´t Verrecken nich, seggt se.  wenn se dorvi blivt, de „Frieen“ , denn blivt noch en GroKo – keen goode Utweg ut dat Dilemma. De swatte Arroganz  in Neddersassen is wieter afsunken un se hebbt dat Vertruun vun de Börgers nich verdeent. Us nich minn swattet Dagblatt hett sik bannig verspekuleert, as se mit de veelen CDU-Födder-Schrieverien meenten de Konservativen an de Macht o drücken. Har sik wat. Dat hett mi duppelt höögt. Fiev Johr wieter hebbt se denn ok in use Landkries verspeelt, dütmol is dat ja nocheens knapp för se goodgahn. Aver trüch to de Varianten… Dor blivt denn ja meist blots noch en över –  „Jamaika“. Dat is dat, wat de Geelen an levsten wüllt – Dat Neddersassen-Trumpeldeert doch noch op de Thron hieven un de König, de dat för sik reklameeren deit, vun de sülvige rünnerstötten – Königsmord sotoseggen. Le roi est mort – vive le roi! Doch för düsse in mien Oogen undemokraatsche Tat mutt denn ja ok „grön“ dat Speel mitspeelen. Warn se wahrhaftig dat Mess holen un vun de Wennhalstrupp tostötten laten!? – Ik hoff dat nich. Wat sachs in Bund good is – dor ward nümbs vun Thron stött – is vör Neddersassen keen Utweg!

Denn lever doch de GroKo, wenn dat sicker ok en denkbar leege Weg is.

Ik bün heel lüschen, wat dor bi rutsuert.

Bit denn-

Niels