Dat is di wat mit de groote Politik, ik segg di… Kuum sünd de verleden Achteiner (de se jo nienich kreegen harrn) wedder bi de Ümfroogen över de fiev Perzent hüppt und de „Sünndagsfroog“ givt een anner Bild af as noch twee, dree Maande dorför, dor mütten se al wedder allens ümstricken. Nu hett de AfD een Lucke reeten! Se harrn sik föhlt ehrgüstern so even bi düsse fiev bit süss Perzent kommodig inricht und weern „dorbi“. Doch denn keem de bruunklöörte Fru Pegida üm´t Eck und se fungen sik an to strien. Se wurrn jümmer mehr in de rechte Eck stellt und dat een orer anner Mol is de Vörsitter Lucke jo ok heel gern mol op denn Tog opsprung, avers blots so´n beeten as een „Surfer“ –  buten anhangen und wenn de Tegenwind to dull opbruusen de, forts wedder op denn fasten Böön to Rooh koomen und sik heel demokraatsch geven. Doch denn keem siene Tweete jümmer mehr no vöörn,  gnabbel an em rüm und kreeg dat Stüer mehr und mehr in de Fust. Und nu weert denn sowiet. Sien Weckroop weer al een Anteken dorför, dat he sien Kapteinsmütz heel fasthooln mutt. He wull sien Posten dormit op een fastet Fundament grünn´, avers he hett sik bannig verreekent. Op dat groote Dreepen vun „sien“ Partei hebbt se em bi de Afstimm gau mol even vun Sessel schubst und denn ok noch beschümpt, as he an Mikro stünn und een Rede hooln dee.

Nu hett he vun düssen Damper Afscheed noomen und dor sünd woll een groot Deel Lüüd, de em dat liekdoon wüllt. De Gauland (nomen est omen!?) hett jo meent, dat he harr leever blieven und strieden sullt, doch nu mutt he sik woll üm sien Posten bi de niege erste Fru (- de heet Frauke, as mien Frisörsch ut de Kinnertied. Vör de weer ik jümmers bang – liggt woll an denn Noom… -)bemööhn, de Pfrünn´mööten jo sickert warrn… Dat Ruckeln no rechts hett de niege Baassch denn ok glieks afstreen. Kloor. Mutt se jo. Is jo een Krieglist ut ole Tieden.  Nu ward se also woll twee Vereene – meist dusend Lüüd wüllt mit Lucke een niege Anfang mooken. Und weer weet, wat dor för een Lawin ut ward, nu, wo he as Grünnvadder weggoohn is. Dor mutt de niege Vörsittersch woll örntlich eer Nett utsmeeten, üm de „ole“ Partei tosomentoholen und ok noch niege Lüüd intofang´! Und dat, wo nu de Pegidas ok noch bi de tokamen Landdagswohlen anpedden wüllt!  Na denn man Petry Heil!