Böse Plätscheritis

PlattsnackerABMoin leeve Lüüd,

mien erste Gedanke an Wohlabend weer, nu muttst Du wech, so veel Schlopmützigkeit kann dat doch nich geben – aber no´n poor Mol Oogenrieben  weer´t denn doch klor – dat geiht! Und dat mookt mi´n beeten bang, mutt ik seggen. Avers Afhauen tellt ni!
De Dütsche Michel har de Wohl – und wat hett he mookt!? De Schlopmütz öber de Oogen trocken und de Krütze för de Mutti mokt. Nix ganz schlimmet passiert in de letzten veer Johr , de „merkelsche Energiewende“ is vun den dicken Altmaier so ümbuut worrn, dat de Börgers doröber ganz füünsch sünd und de „Ökos“ dorför de Schuld geben; de Geldlüüd künnt wieterhin op eern Hupen sitten, de Lieveigenen vun de Agrarwirtschaft künnt wieterhin op Toschüsse för Masse statt Klasse buun und de meisten Lüüd, de nix oder wenig hebbt, sünd wohl alltohop so frustriert, dat se sik und denn Stoot opgeben hebbt. So tomindst doon de Tohlen vun de Bundestagswohl op mi wirken.

För de Roten hett dat nich reckt, de Grönen sünd an ehre Arroganz und de fehlenden Urthemen scheitert , de geelen Wendehälse hebbt eern Hals nu endgültig to wiet dreiht und sik densölben brooken und de Dunkelroten hebbt poor Feddern looten, avers se sünd nu no de „Volksparteien“ de dritte Kraft in´t Land – und ik glööv, dor mütten sik de hochherrschaftlichen Vertreter noch op wat instellen. Meist´n viertel Johrhunnert no de Vereinigung mütten se wohl langsam mol raffen, dat se  se nich anduernd „links“ liggen loten kunnen. Denn DAT is  todeepst undemokratisch… Avers de Schwatten  dreegen de Nees noch´n Stück höger und hebbt noch nich schnallt, dat se eben doch nich genug Mutti  sünd – keen mach sik wohl nu von ehr tweispeelen loten!? Dat is doch echt böse vun de Roten und Grönen, dor  is de Mutti so stark und keeneen mach bi ehr op´n Schoß!!! Tomindst noch ni…De Lütten zieren sik noch und dat plätschert man so vör sik hin.

Böse – bi düt Wort fallt mi noch wat in, wat ik vundags beleevt hev. Ik weer biet „Gosse kehren“ as een olen Mann vörbikeem und  vör sik hin sabbelte – he schlurfte vörbi und  ik weer twüschendörch anderet Warktüch holen. As ik trüchgung, keem he op den Bürgerstieg an mi vörbi und as he Schuller an Schuller to mi weer, dreihte he denn Kopp und knarrte een Wort to mi röber: „Böööse!“ – Ik heff nur dacht, dat dat nu wohl endgültig mit em bargdool geiht,  nu ward he richtig breegenklütterig. So as düsse Mors mit sien „lüttet brunet Auto“, de vörn poor Weeken een anneret Vehikel, dat op´n Parkplatz bi de Sporkass in Gerdau afstellt weer, tosomenföhrt het und utneiht is. Ik glööv jo nich mehr, dat dor noch wat kümmt, avers viellicht weeten jii jo wat!? Kennt jii nich wat vun een brune Kist, de twei is oder siet´n poor Weeken nich mehr to sehen weer!? De viellicht in een Warkstä weer und nu wedder frisch utsüht!? Dat wöör mi bannig freuen, wenn sik dor noch een Hinweis infinnen deit. Also, wenn jii wat weeten, seggt Bescheed bi de ZEITUNG! – Avers viellicht hett de Döösbaddel sik jo sülm de Achs tweiföhrt und hett een wirtschaftlichen Totalschoden!? Dat weer denn sotoseggen de utgliekende Gerechtigkeit!

Bannig freut heff ik mi ok , dat wi wedder mol een Optritt mit de Soborger Remigiuschor harrn, bi de kriesweite Veranstaltung „Musik im Kreis“ weern wi dorbi und hebbt ´n lütt Programm in den Kark trällert. De Kark weer ni so vull, avers bi de groote Antohl vun Veranstaltungen an düsset Wuchenend weer een vulleret Hus wohl toveel verlangt. Spoß mookt hett dat allemol wedder. Hest Du nich ok Lust to trällern!? Wi künnt noch Stimmen bruken, dat Öller is egol! Koomt doch mol to´n „Schnuppern“ – wi dreepen us Mondags, Klock halvig söben in´t Pastorat in Soborg! No de Harvstferien geiht dat wedder los!

So, dat weert erstmol wedder-

lett jüm ni argern- bit to´n nächsten Mol

Niels

Print Friendly, PDF & Email

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.