…de GroKo. So seggt de , de mit Macht de Macht fastholen wüllt. Anners is dat de Ünnergang. Doch is dat so? – Ik denk, dat is ok en Strategie vun de annern, de Swatten, dor an fasttoholen. Se hebbt bannig Fracksusen. Wat süllt se sünner de Sozen maken!? Se maalt en groot Schreckgespenst an de düütsche Heben –  Neewahlen! Dat künnt se de Michel doch nich andahn! Dat is överhaupt nich demokraatsch! Se hebbt doch en Opdrag vun de Wählers kreegen! Un all so en Mess brabbelt se för sik hen. Blots wieldat se bang sünd vör noch minner Stimmen, as se vör meist en halvet Johr noch harrn! Is dat rejell? – Wat is denn undemokraatsch an en Minnerhetenregeern? Dor mütt se sik Mehrheiten tosomensööken, wenn se wat röögen wüllt. Nu hebbt se in de Koalitschoonsplan halfdösigen Schiet uthannelt! Is dat beter!?

Mit dat Postenschachern hebbt se sik ok nich mit Ruhm un Ehr beklackert, de roten Socken geven doch en erbärmlich Bild af. Nu sünd se in de aktuelle Ümfraag ok noch achter de breegenklüterigen vun de AfD afsackt. Se stickt in en groot Bedrullje. Künnt se överhaupt noch de Fall in de politsche Afgrunn opholen!? Sogor de olen Sozen maakt se nu vun de Spinnweven free un se döffen ehrn Semp dortogeven. Schröder, Scharping un Co. lamenteert rüm un föddert de Liddmaten op för de GroKo to stimmen. Worüm dat!? Nu, dormit se alle Schuld vun sik wiesen künnt, de se heel düdelk mit op de Schullern draagt. Wat hebbt se nich allens daan för de Ünnergang vun de ole Tant!? Un de Swatten hebbt dat utnutzt un de sachs gooden Ansätze nich wieterdacht un al gorni ümsett. Groot Loof harrn se för de „Agenda-Gang“ üm Schröder un de Lorbeern instreken. Dat weer, as se de SPD en Mest vun achter dörch de Mitt in´t Oog stoken hebbt. Aver sülm hebbt ok nich so afsneen, as wenn  Michel se vertruun wöör. Mit de Andeel vun de dunkelswatte Süster tohoop hebbt se de Dörtig-Perzent-Marke noch liek so holen. Dat is doch keen „Opdraag“ vun de Wählers mehr, dat is leeg. Un so ward´ enn´n. Mien Mitgeföhl för de roten Liddmaten. De hebbt dat Schicksal sotoseggen in´t Krüüz, dat se maaken…