Leve lüüd,
is dat ny wunderlich, dat wy middenmang in de daumånd so eyn vöärjårhaftiget wedder harrn!? Is joa meyst wat skudderig, so hoge temperatuuren to hebben. Sachs kümmt dor doch noch eyn flåg snej und kül op us to, hev ik simmeleert. Man dor keem niks mer. Nu is de Aprilmånd vöärby und de bööm und blomen sünd al klöörig und an bleun. Und de maymånd is nu so kold – verdwarste werld, is´t ny!?
De grippevyren skynte dat man to pass to kamen – by us in Neddersassen hebbt se in´t dagblatt al vun dutzendwys dootbleaven lüüd un wyt öäver dusend leege lüüd skreaven, by dee se de virus nawyst hebben wüllt. Dor is den glyks wedder heel hysterisk över skreaven worrn. Jüst so by de masern, de hyr und dor wedder opkåmen sünd. De pharmalobby het eyn heel grote macht, dat wyst sik jümmer wedder – und de rejellen medyen setten dat brav üm und måken veale lüüd bang. Aver dat funktskoneert joa oak – as by de andern såken, de se so vun sik geaven. De berichten öäver de Diesel – eyn skandål, wat de industry doar måkt – keen fråg. De politikers neamt dat faken sünner filter op und posaunt den in de cameras, wat dat doch al leeg is und blots see eer partey de anter op düsse anstoonde weltünnergang het. Ov dat is lykers goar keen probleem – is allens op best und de groote koalitskoon wil dat volk blots wedder „gängeln“. Dat givt keen verbot vun de Diesel, man per warven op de blagen plakaten wüllt se de Diesel wåren und so de fryheyd vun de enkelten lüüd. Aver dor den oak blots wedder de dütsken, wyldat de andern joa al rutsmeeten höört… Dormit wy wedder eyn volk vun „Vaterländern“ ward un ween künnt! De vlaggen hoch und nå de wål kümmt den dat lykskalten, kennt wy dat ny vun jichtenswo? Wårt ju weg und by de tokamen wål blots ny ut protest by de rechtsbuten und brunen konservativen dat krüüz måken – denn erder by Die PARTEI, de ÖVP ov ander lütte vereynen. Hauptsåk de sünd vöär Europa! Dat bruukt wy, oak wen veel leege skyt dormang is, wat se us vöärsetten. In us ståt löppt dat joa allens ny so rund as se us de wys måken wüllt. Dütskland ward findselwys avhungen. Versorgen mit LTE ov den G5 – mer lökker as versorgen, climawandel – dat inolden vun de skeaden, de se fastset hebbt- ward op wunsk vun de lobby in de industry opskoaven… De lüüd vun dat eyland öävern Ärmelcanal holden dat, wat se toseggt hebbt – de hebbt in eyn versöök dat verstromen sünner coale dorvöär optobrennen probeert – 122 stünden het dat klappt, keen latücht is utgån und dat leaven is ny tosåmen broken. Geyt. Blots ny in us kuntreyen. De dütske Michel verslöppt wedder de wandel.
Wandel – doar is joa noch wat – in Bämsen süllt de lüüd an de dag vun de Europawål – an 26. vun maymånd – oak de nyge baas vun de samtgemeen utwälen. Dree mannslüüd hebbt sik opstellen låten. Eyn vun dee is wol eyn skyre technokraat – und syn utsaag, mit de he de stimmen invangen wil, seggt veal – und niks. „SEGGT-PLÅNT-DÅN“ – wen dat syn motto vöär eyn beeter warkerej ween sal, den bruukt nümbs düsse man. Dat is joa de alldag. Sünner düsse avloop geyt niks. Wo süllt de lüüd em also vöär de stim geaven!? Verwalten, dee to slörig is, dee kennt wy. Ik glööv, de is by de udels in Hamborg goot ünnerbröcht. Doar sal he man blyven. Doar kan he verwalten.
Leeve lüüd, oak wen eyn barg dwars löppt, skryvt jüm dat in de klenner und måkt bruuk vun june recht to eyn demokratske wål to gån! Und måkt jüm eyn kop, wodennig Europa utricht warrn sal – fingers weg vun de rechten, de bruunen, de kövsken „Vaterländer“. Wy bruukt veal, wy bruukt wessel in veale belange, aver keeneen bruukt düsse trüchbleaven stroköp!
Låt jüm ny ünnerkreagen!
Good gån! – Niels
