Moin leeve Lüüd,

nu, in de Adventstied, hebbt dat veele, wohl  de mersten,  bannig hilt. Bi uns to Hus is dat nich so. Wi hebbt de Adventstied suutje angoohn looten und de erste Sünndag güng mit een kommodig Fröhstück los. To Klock ölben sünd wi denn to Kark ween. Dat weer man ganz scheun kold an de Fööt und Been, weer jo de Daagg winterlich kold worrn. No denn Gottesdeenst sünd wi denn erstmol tohus to´n Opwarmen. Wulln eentlich noch to´n Wiehnachtsmarkt, avers de Fööt… No´t Koffiedrinken an Nomiddag weern wi denn doch noch een Rünn ünnerwegens, dat hett doch good doon. Und an Avend hebbt wi tosomen wat fienet to´n Eeten mookt und för den lüttsten Spross een Adventskalenner torechtklütert. Wöör jo denn doch Tied! Dorbi harrn wi liesen Wiehnachtsleeder an. Dat weer richti moij. Harr ik gor ni dacht, dat de Adventstied so scheun ween kann. Man mutt sik wohl nur op inlooten und denn Kommerz und de mallen Lüüd eenfach mol utklammern, de keen sünst so dat Leeven schwor mooken wüllt.

För de Tiedgenossen, de dat noch nich henkreegen hebbt, heff ik mol een Gedicht opschreeven- viellicht givt ju dat denn Anstött to´n Rünnerschalten…

Adventstied

Nu is se wedder dor

de besinnliche Tied

Woso besinnlich ?

Is di dat klor!?

Vun Summertied an, dor  leegen

Dominosteen und Pletten in´t Regol

Dat blinkert und blitzt  överall

Dat´s een groot Konsumentensegen

De Loger sünd vull

allens kannst kriegen

Fien Sooken, Dummtüch

de Lüüd kööpen as dull

Jung, Old, Lütt und Groot

all ward bedacht

bi een vun Haarten, bi anner as jümmers

sogor de Bettlers kriggt mol wat in´ Hoot

Advent is de Tied

de Heiland kümmt bald

dat´s Lüüd oft nich wichtig

hebbt leever Kommerz op eer Siet

De Vörwiehnachtstied

is so heel kommod

jümmer hilt, kuum mol Roh

hörst dat besinnlich Leed?

(NT 2014)

Nu will ik ok besinnlich ween und för düt mol mien lütt Lästermuul holn, ofschon- ik wüss dor jo wedder wat to berichten. Avers de Hümpels sünd in tokamen Maand ok noch dor, dor bün ik sicker! Und wenn nich de, denn find sik een niege. Viellicht is bit dorhen jo sogor een Barg dorut wussen!?

Hebbt een goode Tied, leeve Lüüd,

Gott sien Segen sall bi ju ween,

und jii weeten jo – lett jüm nich argern!

Bit to´n tokamen Johr, dor seht wie uns an 22.Janner bi miene Lesung in „Treffpunkt Buch“, Klock söben an Avend!

Niels