Wunderbår dagvårt (2)

De sünnavend vung al an vöärmiddag an – halvig teyn güng dat los mit de jårshauptversammeln vun de vereen. De vörsitters weern ny ney to wälen und so güng dat heel fiks öäver de büün. Den kemen de vöärdreeg – de perfesser ut Flensborg, her Langhanke, weer låt, wyldat syn tog ny to rechte tyd rankeem. So het den de tweete vöärsitte, Niels Tümmler, syn vöärdrag öäver „Platdütsk in de Socialen Medien“ holen. He geev eyn öäverblik öäver verskillen syten op Facebook und vertel de lüüd ouk, dat op Youtube ny min films to bekyken sünd. Givt eyn bült syten in net, man vun verskillen culeur – vun lütte saken, dee sik mit flora & fauna op sassisk bevaten, bit hen to grote syten, dee eyn pår dusend liddmaten hebbt. Dat grötste problem is tohoop, dat dat keen normte skrivt vöär Sassisk geven deyt, so wöör vaststellt, den de utbreeden vun sassisk is lang ny blots in de dütske kuntrey. Ouk in Nederlanden und de süden vun Denmark givt plattdütske lüüd…

In de twüskentyd weer Perfesser Langhanke intrudelt und so weer de tweete vöärdrag vun em holen. Vöär de Klaus-Groth-Sellschap vertel he wat öäver dat leven und warken vun und öäver düsse groote nåm in de nedderdütske literatuur. Groth syn dån in eyn vyne öäverblik vun ny mål eyn halve stünd rinpakkt. Good dån!

Den geev dat noch eyn utvöären öäver dat „Kompetenzzentrums für Niederdeutschdidaktik“ vun Ulrike Stern ut Meckelbörg-Vorpommern. Se vertel beten öäver dat dån und de opstellen vun düsse inrichten. De avslut dee den Christiane Ehlers, se bröch de tohörers wat öäver dat Nedderdütsksekretariat vun de Bundesrat vöär Nedderdütsk to gehör und geev eyn inblik in seers warken.

Nå düsse vullproppte vöärmiddag weer den erstmål middagsverpuust und de nåmiddag güng dat den wyter mit „Op de Kist“ – negenteyn lüüd dregen eygen teksten vöär. De moderatjioon har Dr. Hans-Hermann Briese, dee den achternå vun de tweete vöärsitter vun de vereen noch eyn „bedankt“ und eyn lüt präsent kreeg – dat weer syn letsde leyt vun düsse veranstalten. Man bang bruukt keeneen ween – de nvolgers sünd al vunden und ouk in 2020 heet dat wedder „Op de Kist“ – lidmåten und besökers leest eygen teksten!

Und den güng dat ouk sünner groote verpuust wyter mit dat „Literarische Kleeblatt“ – veer lüd snakkten und diskereerten öäver veer bökers, dee in de verleden månden rutkåmen sünd. Eyn kottwylig veranstalten und good präpareerte „vaklüüd“, dee doar weern: Carl-Heinz Dirks, Heiko Freese, Petra Kücklich und Ulrike Stern. Öäver düsse bökers wöör snakkt:

Bullerdiek sien Buddelbreven
(von Bolko Bullerdiek)
Is lütt Schütt al dor?
(von Peter Schütt)

Ligusterdrööm
(von Dietrich H.Schmidt)
Platt mit Plietschmanns
(Schulbuch, Hinstorff-Verlag)

Vortsetten volgt…

Print Friendly, PDF & Email

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.