Wehdaag



Leve Lüüd,

wat is mit us Volksvertreters los!? – De Swatten hebbt för sik reklamiert, dat se nu noch de enkelt blieven „Volkspartei„ sünd… Se hebbt dorbi översehn, dat se sünner de bayerische Pickel ok blots noch bi 26 Perzent dümpelt. Dat is so wiet nich weg vun de afsmeerte SPD. Un dat de Sozis dor lannt sünd, wo se sünd, dat heff ik ju al kott na de verleden Wahl in 2013 schreven. Tominst sünd se nich wiet weg vun mien Orakel… En Wessel har Düütschland goot daan, dat is de Lüüd, de mit Hart un Bregen bi de Saak sünd, egens klaar. Nu weer ja tominst en Utsicht op wat Nieges- En Versöök, sachs de Kurs sozialer un ok mit Blick op de Ümwelt to richten. Aver de sülmverlevte Wendehalspartei mit ehr Topmodel Lindner is ja na en wuchenlanget Rümhampeln verswunnen – lever gorni regeern, as slecht regeern – hett he as Adjüs in de Mikrofone flustert. Aver se weern sik doch all eenig, dat dat blots beter warrn kann, wo doch de GroKo all slecht regeert hett… geiht dat denn blots noch bargdaal mit us düütsche Staatsführn!? Keeneen weet so recht, wat dat nu all warrn sall. De Grönen sünd konsterneert, de Swatten sabbelt blots noch Dummtüch, de swatte Steert ut dat südlichste Bundesland hett mit sik sülm to daan. Un nu setten se all de ole Tant SPD ünner Druck, dat se doch wedder bi Mutti op´n Schoß sall. Fatale Situatschoon för de roten Socken, denn se harrn ja de (richtige) Konsequenz ut dat Ergevnis vun 24.09. trocken – de Michel mag se nich lien un se sulln sik in de Oppositschoon trücktrecken… Doch nu sünd se op enmol wedder in´t Rampenlicht vun de Maneesch – se ward nu an Neesenring vun us Präsi un de CDU trüchführt an Trog vun de „Verantwortung„. Se hebbt nu de swatte Peter un keen Ass mehr. Mutti is nich mehr in de Laag wat to richten, all hebbt de Büxen vull vör Neewahlen un en Minnerheitenregeern vun swatt un geel of gröön weer veel to demokraatsch. Dat will keeneen de dumme Michel tomoon, dat üm Vörhaben strien ward un nich all achter versloten Döörn allens klor maakt ward un dat Parlament mit sicker Mehrheiten blots noch afnickt… Mehrheiten söken – nee, blots dat nich! Denn kunn dat ja angaahn, dat de Klientelpolitik nich mehr maakt warrn kann un dat de Lobbyisten ok noch füünsch ward, wenn doch mol wat scheef gahn deit!

Wedder mal segg ik – armet Düütschland und doch

en besinnlich Adventstiet!

Niels

 

Bildquelle Beitragsbild : http://bilder.bild.de/fotos/frank-walter-steinmeier-200182140-48784792/Bild/3.bild.jpg

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: