Wat de Politik mit denn ESC to doon hett



Moin leeve Lüüd,

nu is de ESC wedder vörbi. Und düsse Veranstalten hett sien eegen Regelwark. So seggt se jümmers. Kuum eenmol, dat de Anseggen över de Favoriten wohr warrn. Keeneen kann seggen, of de Schlager, de Popnummer orer de Sangeslüüd mit de dullste orer de minnste Kleedaasch an End boben steiht.Und dat hett ok wat mit dat Utkoomen ünnereenanner to doon. De een mag de annern nich orer se geven sik de Punkte, wiel se in verleden Tieten tosomen in een Staatenbund weern, also so op dat politische Rebeet. Dorin is bestimmt ok al een Grund to sehen, worüm de düütsche Biedrag nix vun de Griechen afkreegen hett. Avers dat is nich allens – und  keen nu de mersten Punkte afkriggt, dor hebbt se noch keen Orakel funn.Bit vunjohrn. Denn nu is klor, dat Düütschland so een Orakel hett. Und dat düsset Medium sogor de Punkte vörweg anseggen kann! Förwohr, dat is doch wat för de Tokunft! Dat düütsche Orakel heet Wolfgang. -  Wolfgang!? Keeneen is Wolfgang!? Wolfgang is keen Opossum, keen Oktopus und keen Farken. Wolfgang is een Minsch. Und düsse Minsch hett all vör Maande vertellt, wo dat utgeiht mit düssen Contest. Blots he wüss viellicht nich heel genau, wat he orer wie he dat anseggt. He hett orakelt, dat he wat dullet op de Been stellen ward. Dor wull he ok keeneen an rütteln looten. Dor hölp keen Betteln und keen Zackerreern. He bleev hart. Und so hett he dat denn dörchdrückt – de swatte Null! Wenn dat keen Orakel weer, leeve Lüüd. Maande in vörrut antoseggen, dat dat een Nullrünn ward! Und dat Leed harr ok noch meist denn richtigen Titel – Black Smoke. Harrn dat woll leever Black Zero nömen sullt. Avers dat weer denn viellicht ok wedder verdächtig ween – wo elkeen Politiker doch ok jümmers ünner Verdacht steiht, dat dor Dolers tohlt warrn – so för de Privatschatull.  Und so hebbt se also denn Titel een lütt beeten anners mookt und dat Orakel as „Swatte Null„ för denn düütschen Finanzhushalt  utgeeven.

Weer doch een gooden Trick, orer!? Dormit dat allens hinhauen dee, worr denn ok noch dorför sorgt, dat Andreas verkümmern dee. He weer de eentliche Sieger vun de düütsche Vörrunn. Keen weet, viellicht weer allens anners koomen, wenn he Jan, Hein, Klaas orer Pit heeten harr. De harrn jo ok alltohoop een Boart und de döffen mit. Avers Orakel Wolfgang hett dat anners wiesseggt und dorüm is dat nu so koomen as dat koomen müss – Düütschland … keeneen Punkt! Und jii kennt nu endlich de Wohrheit!

Let jüm nich argern!

Niels

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: