Vun de groote Politik

Mann in´ne Tünn, dat weer viellicht´n Maand. Toerst geev dat´n Barg Opregung över wat, dat gorni vun mi schreeben wör. Dat, wat dorut mokt worn is, kunnen veele Lüüd nich verstohn und mi is dat bit hüt noch ni kloor, wat dor twischen de Zeilen leest worn is. Op de anner Siet geev dat aber ok Lüüd, de dor foorts wat Politischet rutspekuliert hebbt. Oha!  Aber, wat sallt – vergeven und vergeten.
Een anner Sak, de mi un veele annere (leider man ni so veele as man dat erhofft hett) ümdrieben dää, weer de Needersassenwahl. Kott för de Wahl geev dat noch een Dreepen in dat „LCD“ mit Herrn Trittin vun de Grönen. Dat weer´n fiene Geschicht und dor wörn bannig goode Frogen stellt. Man, wat mi wunnert hett, de, lut AZ, Querdrieber oder Querulant nömte boberste Frogensteller vun Soborg und Ümgebung weer gorni togegen. Wi dat vundaags in´t Daagblatt notolesen weer, har de Mann Husverboot kreegen und weer vör de Veranstaltung wedder no Hus schickt woorn. Ik bün mol gespannt, wat dor noch allens rindichtet ward…

De Utgang vun de Wahl weer denn ja ok een bannig interessantet „Fotofinish“. De Schwatten mit eern Anhängsel hebbt twüschendörch all rümtönt, dat se de Gewinner sünd und nu müssen se alltohop de Stöhl rümen. De bitherige Landesvadder seet ja nu ok all bi Fru Merkel to Huulen op´n Schoß. He ward wohl no Berlin gohn, denk ik. De anner Figur is een Geelen. Sien End is dank de Leihstimmen vun denn „Partner“ ja erstmol op den lange Bank schooben worn. Vun düssen ramponeerten Huupen ward wohl keeneen no de ganz groote Politik hinloobt warn – eher dorvun wech. De annern lütten Parteien sünd ja nu noch lütter woorn – de Linken sünd vun eere Wählerschaft vergeeten woorn und de Piraten sünd wohl beeter op de söben Weltmeere ophoben…

Bi us ward sik nu ja no denn „Machtwessel“ viellicht mol wat ännern, damit ik tokünftig nich mehr öber de  Art und Wies vun de „industrielle Fleischproduktion“ schümpen mutt. De niee Regierung steiht in de Pflicht und de Lüüd ward dat sicker beluern. Vör allen Dingen mutt man ja ok de Buern (sünd dat eegentlich noch wölk, wenn se nur noch Leepervertreeg intoholen hebbt?), de sik und us de Grootställe in de Landschaft set hebbt, een vernünftigen Vörschlag ünnerbreeten, wie se denn eer Dasien sickern künnt, ohn dat „Insetten und Afrüümen“ alle 32 bit 35 Daag wieter mittomoken.

To´n End will ik noch miene groote Freid doröber to´n Utdruck bringen, dat een Hinwies in mine lütje Schrieberie dorto föhrt hett, dat in dat niee Book vun de Volkshochschool us feinet Plattdüütsch nu nich mehr „Dütsch för Dütsche“ is! Also, Lüüd, bit to´n nächsten Mol und lett jüm nie argern!

Print Friendly, PDF & Email

1 Kommentar

  1. Arnold Kröger Antworten

    ik kann nich so gaut platt schnacken, un to lesen fallt mi dat ok schwor.
    Dorum hebb ik min Kommentar ok up Hochdütsch schreben. Den künnt jüh unner de Rubrik „Kommentare bei Kontakt“ lesen. Kann ok as Leserbrief in de nächste Printutgabe druckt wörn.
    Tshüs, und fallt nich up de Näs, wenn nu Blitzis komt.

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.