Vun de Groote Politik 9/16-2



Leeve Lüüd,

ok in Berlin sünd nu de Korten nie mischt worrn – de Swatten un de Sozis hebbt so een vör de Koffer kreegen, dat dat för de Koalition as vörher ninich mehr recken deit. Geiht blots noch mit een Dree-Parteien-Kombinatschon. Un dorvun givt wedder een Bült – vun links bit rechts is allens möchlich – wobi sik de Blauen vun sülm verbeeten, denk ik mol. Un een Rot-Swatt wulln de Lüüd woll nich mehr, also mookt dat ok keen Sinn, denn nu noch mit een drütte Partei in Boot dat ole Speel wieder to speelen. Ofschoonst, de Liberalen wöörn sik sicker höögen, wenn bi se ankloppt ward. Denn wöörn se woll Juchen, un dorut dreihen, dat se nu wedder trüch op de groote Bühn sünd – sachs wüllt se denn glieks de niege Bundeskanzler/sch stellen!? Ik denk mol, dor ward sik wat finn´ un de niege Regeerschwadron ward so wieter klabüstern as vördem – se künnt dat Milliarden-Grav Flughafen jo nich eenfach so instampen… Ik heff de Laag vun de groot Areal nu nich vör Oogen, aver mütt de grooten Fleegers denn ok  gau hochtrecken un denn forts na Siet afbeegen, dormit se nich över de Hüüsen fleegen doot!? Süht liekers lustig ut, wenn so een groot Apparat op eenmol üm´t Eck fleegt. Is wohrschienlich so rejell as bi Bugs Bunny de Luftbrems.

So een Oart Luftbrems wull de Kanzlersche nu woll ok antrecken. Se hett seggt, se wull an leevsten de Tied trüchdreihen, glieks üm en heele Dutt an Joohrn, üm denn anners to doon – Se hebbt sik duntomalen op de annern verloten, se wulln de Joohrn vör 2015 keeneen Flüchtling opnehmen, hett jümmers nur „Dublin, Dublin, Dublin„ heeten. Denn keemen aver de veelen Lüüd un de Kanzlersche hett as een Mensch hannelt. De Lüüd wöör holpen un se is veel attackeert woorn. Wieldat se de Joohrn dorvör aver op Afschotten sett harrn, sünd se överrullt woorn. De Fehlers hebbt se mookt, dor nützt  keen Klocktrüchdrein. Viellicht sulln de Politikers fakener mol Mensch ween un nich blots jümmer de Speelfiguren vun de Lobbyisten. Ik hoff blots, dat de Baas vun de Berlin-AfD nich recht hett und se tokamen Johr in Bund ok so toleggt…

Afschotten nützt nu nix mehr.

 

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: