Vun de groote Politik 8/15



Nu hebbt wi denn Schiet. De Griech steiht vör Niewohlen, wiel de Alexis trüchpett. Wat dat al wedder kussen deit! Dor hebbt se nu Milliarden kreegen, üm de Griechen, ne, de Banken to retten, vörerst tominst, und nu mütt de woll denn Rest för niege Wahlen opbruuken. Fört Volk is wedder nix över. Denn kann dat Utröövern ja flietig wietergahn. Eentlich ward doch een anner Land blots utplünnert, wenn dat een Krieg mit örntlich Balleree un Mord un Dootslag geven harr. De, de nich wunnen hett, mutt ok no de Slacht noch wieterblötten. Dat Volk ward utsoogen und dat nich to knapp. Und so mooken se dat nu mit de moderne Kriegeree. Se warven för een Tokumst in een eenig EU, all süllt se mitmooken und denn hebbt wi ok de tokamen söventig Joohrn Freeden in Europa! De Grooten hölpt de Lütten und allens is good.

Denn lüchten de armöötschen Länners in Europa de Oogen und se wüllt partu mitmooken. Tosomen sünd wi stark! Wat dat scheun klingen deit! -  Denn ward verhannelt und de Tohlen ward solang trechschoven , bit dat passen deit. Hartlig Willkamen in de EU. Wedder een Mielensteen op denn Weg to een mastig Kontinent, de de Macht hett. De in de Welt dat seggen hett. Und de Michel deit sien Bommelmütz wedder tegen een Stahlhelm tuschen und geiht vöran! Dor wüllt se mitievern, de annern. Gülden Tieden ward se toseggt und se ward mit op denn Ossen sien breeten Rüüch hievt und denn ward tohoop de Geschicht schreeven – eenig und stark! Und heel Europa is een Goarn Eden! – Blots de Oss, de hett keen Saddel und weer sik nich hooln kann, wiel he to maddelig is, deit fix weer rünnerrutschen vun den kommodigen Sitt. Orer he ward fastbunn´und an denn Dolertropp bammelt. Denn is he noch dorbi und föhlt sik eit vun dat eenig Europa. Em ward holpen. He höört dorto. Man de Knoken kannst al dörch de Huut schimmern seehn. Und dat Liekendook in blag weiht al und de geelen Steerns dorop blinkert so scheun. De Franzoos is ok al an wanken. Blots de olle Brit, de will noch ni recht. Dat ward avers noch! Sünner echte Krieg! Över blivt… mi schuudert so.

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: