Vun de groote Politik 12/14



Moin leeve Lüüd,

in´t Dagblatt stünn to lesen, dat de Kugelblitz von de ole Tant in Sooken Wirtschaftsafkoomen mit Kanada (Ceta) denn Afsluss vörandrieben will. Nu rumohrt dat binnen vun de SPD. He hett wat toseggt und will sik an leevsten nich doran holen – dat teeknet een Spitzenpolitiker jo eentlich ut; is sotoseggen een „Adelsprädikat„ in unse Welt. Man, he hett dat wull lichtfertig op Telefon as KNS – KottNorichtSendung-schreeven, dat dat op jeden Fall een Afstimmung in Vörfeld geeven ward. He meent avers nu, dat he dat dörchdrücken mutt – in Hinblick op dat TTIP-Afkoomen mit de Amis is dat för em wichtig. Dat will he ok üm´t Verrecken dörchsetten. He will denn Klüngel vun CDU und Wirtschaftsmacht wiesen, dat de SPD kompetent in düsse Sook is. He meent sogor, dormit kann he de dörtig Perzent bi de Bundestagswahl anpielen. Dorvun dröömt he. Ik glööv jo man,dat he dat Schipp nich stüern kann. He is bang för de Afstimmung in de eegen Reegg. Denn sünd de Roten Socken nich dorför, ward de Wirtschaftsdamper wohl op een Sandbank oploopen – und de Swatten treckt he glieks mit op´t Drööge. Ik hoff op de Minschen in de SPD. Viellicht finnen sik nuch, de markt hebbt, dat unset System al lang rott is. De Överschrift hett heeten „IM NAMEN DER WIRTSCHAFT„, wann kümmt de Dag, wo se schrieven „ Im Namen der Menschen /Bürger„!?? Avers mit denn Michel kann man dat jo mooken. De Swatten, alle vöran de Finanzminister, wüllt de koole Progression nich afschaffen. Iiskold beharrt se op dat ungerechte und överhaupt nich soziale Afpressen vun Stüern. Dat de Lüüd, de al wenig hebbt, dorünner an mersten to lien hebbt, dat stört se överhaupt nich. De sünd so wiet weg vun denn Alldag. De weeten nich, dat „bloß eine Entlastung von einigen Euro im Monat„ för een Barg Lüüd een groote Hülp ween kann! Is ok nich verwunnerlich, denn de Maad in Speck schert sik nich üm dat, wat buten vör sik geiht. Leever de Lüüd belöögen und bedröögen. De Michel hett sien Verdarven jo wählt.

Aflenkt hett de Union de letzten Weeken geern vun eeren Beutezug an´t Volk, wenn se mit eere adipösen Fingers op Thüringen wiest hebbt.„ Dor, kiek dor – dat Böse luert bi de annern!„ Avers de Lüüd vun Linke, SPD und Gröne hebbt se een scheunet Geschenk in´n Nikolaussteebel packt. Een lütten Hoffnungsschimmer för de Demokratie in unset weltmachthungriget Düütschland.

Ik wünsch ju veele dicke Geschenke! Frohe Wiehnacht!

Niels

 

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: