Vun de groote Politik 12/14 -2



Moin leeve Lüüd,

de Schwatten harrn eer groot Dreepen in de Karnelvalshochburg – meist dusend Delegierte keemen de Daag tohoop, üm sik sülm to bewiehrökern und „de Richt fasttoleggen„. Ik heff dat mit gröttste Opmerksamkeit opnoomen, wat se dor wedder vertellt hebbt. Mutti Merkel is wieterhin de Boberste, se hebbt jo ok nich würklich een anner Schnut, de denn Vörsitz övernehmen kunn.

Denn hett se in eer Sabbeln nix Nieget för de Tokunft vertellt. Dat se Wirtschapp hörig sünd, weeten wi all, se drückt dat nur annersrüm ut. Dat se för denn Mammon de Wirtschappsafkoomen mit Kanada und de Amis dörchdrücken wüllt, dor hett se jo eern „Partner„, denn Kugelblitz Gabriel hitt mookt. De will jo nu wiesen, wat he för´n Kerl is. Heff ik all över schreeven…Avers denn hett se no dat kotte Striekeln de lütte SPD ok glieks wedder een op´n Kopp geeven und hett de olen Tieten notruert und de  Afsturzpartei ut de Kist holt. Se wünscht sik de FDP trüch – is dat al een Afgesang op de Groote Koalition!? Schienbor hölt se nich so veel vun de Arbeit, de de Sozis afleepern. Wöör se sünst düsse olen Geschichten ut de Versenken holn!? Ok dat se denn dat „Nein„ vun de Grönen noch beduernd bobenropp packt hett, sprickt nich för een „vertruensvullet„ Tosomenarbeiten mit de ole Tant. De Wohlkampf is inläut, wöör ik mol seggen!

Opfullen is jo ok dat „Nichterwähnen„ vun denn rechteren Rand vun de Schwatten. Ik wüss gorni, dat Schwatt und bruun tosomen blau ergivt – heff ik wohl in de Farvenlehr wat verkehrt verstoon! Avers egol, nur de Kauderwelsche hett denn jo doch noch eenmol dat groote Mess utpackt und een beeten in de Richten vun de „AfD„ rümstookert. Dat klung jo so, as wenn he  de Aftrünnigen eentlich trüchholen wull in´t schwatte Wählerriek. Nur ward dat wohl nix, wenn he düsse „potentiellen„ (und ehemaligen) Wählers hofiert,  indem he se as „ewig Gestrige„ nöömt. De annern Beteeknungen will ik hier gor nich nochmol bemöhen. Ik bün dormit inverstohn, wenn düsse schienhilligen Kostümdreeger de Lüüd vun de Fahn goht. Nur dat de sik denn in dat Lager vun de „Breegenfrieheit„ begeeven, dat passt mi ok nich.

So, leeve Lüüd,

een besinnliche Tied

wünscht ju

Niels

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: