Vun de groote Politik 08/16-2

Leeve Lüüd,

in een poor Daag is ok bi us in Neddersassen Kommunalwahl. Man in de Republik is dat woll noch nich so ankamen. Nülichst – mag verleden Week west ween – heff ik in de Narichten, ik glööv dat weer dat „heute-journal“, een Bericht över de anstohnde Landdags-/Kommunalwahlen seehn/ höört. Se vertellten wat vun Meckelnbörg un Berlin, de een is an dat erste Wuchenend, de anner an dat drütte in Harvstmaand. Man worüm hebbt se nix vertellt vun de tweete Sünndag, de Wahldag in Neddersassen!? Is dat een Wieser för dat Volk ween!? – Dor sitten de Verbreekers vun Volkswagen, sotoeggen de Volksbeschieter, dor vertellt wi leever nix vun, anners denkt se noch, dat ok de Wahlwerte manipuleert woorn sünd!? Keen weet dat schon!? De, de achteran wedder Utreden bruukt, de ward sik dor liekers an klammern. Aver sachs liggt dat ok doran, dat de Medienlüüd  leever op de Meckelbörgern luert, wieldat se doch dor een Bült mehr „rechte Schiet“ finnen doot. Dor lett sik beeter över polemiseeren. Un Berlin is ja de Hauptstadt, dor mutt man ja wat över seggen… aver Neddersassen!? Phhh. Dorbi is doch de groote Politik ok bi us ünnerwegens – dor is de rote Lühmannsche, de över „soziale Gerechtigkeit“ parleer, de grööne Hofreiter, de över TTIP vertellte un de swatte Otte, de…? Har de ok wat to seggen!? Kann mi ni besinnen, dat he ok wat loslooten hett. Tominst in de swatte Klimbimgazett, de Utgaav Nummer een in 2016 un woll ok de eenzig, heff ik em glöv ik seehn und he hett wedder över dat Mutt vun de A39 parleert orer över de Rüstung un dat anner weer de Landtags-Hillmer!? Weet nich so nipp un nau, is ok liek, de A39 is för veele Joohr ok wieterhin keen reellet Thema. Viellicht weer ok een „Fachlüüd“ för de Rüstung op een AfD-Veranstalten? Nee, de mookt een „Börgerfraagstünn“.  Bi dat Füerwark vun Politklamauk kümmt een heel dörcheenanner! An Rand vun een Veranstalten harr ik een lütte Snack mit een Buern . De hett mi vertellt, dat de Buern un de Gröönen eentli heel dicht binanner  sünd, doch dat letzte Finzel, dat fehlt woll noch. So swatt is de Buernwelt woll doch ni!

Vergeet nich to Wahl to gahn!

Print Friendly, PDF & Email

2 Kommentare

  1. Plattsnacker Antworten

    Leeve Fru of Mann, de sachs ok een Buer is!?
    Mit dat Satzendteeken wull ik nocheens to´n Utdruck bringen, dat doch een Hoffen besteiht. Ik heff, as schreeven, mit Buern snackt un dor hebbt se mi dat vertellt. Ok vörher hebbt se in de Rünn seggt, dat dat Programm ünner Chr. Meyer nah bi se is (“ Wi harrn noch nix beeteret…“), man dat givt ok noch veel anner Kraams, wat noch nich passen deit. Dat is denn sachs de Grund, worüm so veel „Swatte“ dorbi sünd. Nich verurdeelen, tohoop krupen un snacken un diskuteeren. Schrittwies beetere Lösen finn´! Mit „Hardcore“ warst dor nix! Dat is mien Indruck west!

  2. h.g.a. Antworten

    Ik wunner mi över dat Ausrufeteken an End vun den Artikel.
    De Buernwelt is nich swatt? Dann go mol up en Veranstaltung vun Jungbuern mit dan gröönen Minister. Da kannst Du wat beleven.
    Oder is dat jetz de Anfang vun de Groote Koalition up Kommunalebene, vun de Roten afkeken?

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.