Vun de groote Politik 07/14

De groote Politik hett mi in de letzten Weeken mächtig verfeert – öberall haut se sik doot. De Israelis kloppt sik mit de Palästinenser, de Russen manövert dor in de Ukraine rüm, rechtfertigt dat avers allens mit ehren grooten Friedenswillen

Se(de Separatisten, de Israelis, de Palästinenser, de Ukrainer,..)scheeten Raketen op de Bevölkerung, wiel se Freeden wüllt!? – De sünd doch all breegenklütterig! Und wat mooken de EU und de NATO? – De eiert ok wat rüm, und sind zögerlich. Sanktionen gegen de Russen? – Ja. Nu mooken wi ernst! Avers nienich  so dull. Nich, dat de Wladimir uns denn Gashahn doch noch afdreiht. Dat kann de Schröder, sien beste Macker, de de dütsche Afhängigkeit för een poor Millionen fründschaftliche Dalers verköfft hett, ok nich ännern, wenn dat hart op hart kümmt. He hett jo nix mehr to seggen und de Politik hett em dorto ok noch twei mookt – weer jo jüst erst in groote Lettern to lesen…

Avers, wat is denn, wenn dor wirklich keen Gas mehr kümmt – so richtig op Null, nix! Denn warrn erstmol de Reserven verballert, sünd jo Millionen Kubikmeters. Und bit de all sünd, ward de Zarewitsch sik wohl wedder beruhigt hem und dat givt een „diplomatische Lösung“.  – Wat!? He will jümmer noch nich!? Schiet! Also mutt unse gröttste Null (se is jo süsstich worn) wohl een anner Ass ut´n Ärmel trecken – dat hett se all lang parat, eere Michels looten sik jo jümmer so scheun för blöd verkööpen – dat Fracking! Öberall in´t Land – und kiek an, de „groote Politik“ is gor ni so wiet wegg -ok in unse scheune Landstrich givt dat Vörrichtungen to´n Fördern und Bohrschlamm und Quecksilber und annern Schiet und Dreck givt dat bobento! Avers man goot, dat de Ukraine mit eere süsstein Atommeiler so wiet wegg is! Und dat Israel und de Gaza-Striepen mit dat Dootmooken vun unschullige Minschen uns jo eentlich nix angeiht! Und dat Elend in Syrien!? – Ganz wiet wegg! De Lüüd dor bangt ok üm eer Leben und kloppt an unse Döörn – avers wi wüllt se nich hem – dor find sik doch bestimmt een Wegg, üm se wedder aftowiesen! Dormit wüllt wi nix to doon hem – ach, ik hör jetzt beeter op – ik warr sonst noch richtig fünsch und loot mi argern!

Öber unse Bildungskatastrophe und denn ganzen Schiet mit dat vermalledeite  „Bildungsgeld“ oder wi dat heet, will ik mi nich utlooten, sunst mutt ik mi ok doröber noch argern, viellicht in nächsten Maand…

Ik wünsch jüm all denn Freeden, denn jii ju sülm mookt –

mit all de Lüüd, de üm ju rüm sünd. Dat is doch mol´n Opgav!

 

Bit to´n nächsten Mol

Niels

 

 

 

 

Print Friendly, PDF & Email

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.