Vun de groote Politik 06/15



Nu is dat also so wiet. De Griech is opstoohn vun Disch und hett seggt, dat nu erstmol dat Volk froogt warrn mutt, wodenni dat denn wietergohn sall. Nu sitten de grootkupperten Politikers dor und de Griech wiest se de lange Nees. Rutsmeeten künnt se se nich. Und dat weeten se nipp un nau. Ik finn dat jo good, dat dor nu mol een opstoohn is und düsse heele Löögerie de Bless wiesen deit. All wüllt se blots jümmers Wasstum, Wasstum, Wasstum. Se marken nich, dat de heele Tosomensluss vun „EUROPA„ al lang wackeln deit. Dat geiht op Kusten vun veele Millionen Lüüd in Spanien, Portugal und annerwegens. Düütschland steiht to Tied in düsset Europa good dor, beeter as all de annern . Und binnenlands? Dor kiekt keeneen so nau hin. Dat dor een Barg scheep löppt und Oplagen, de se vun de EU kreegen, eenfach ninich ümsetten orer versleppen, wenn se dat nich in Kram passen deit…Dorsitten und aftööven, dat kann se, de Mutti. Und se stüert eere Blindgängers üm se rüm mit eer NSA-Handy glieks mit. Keen nich op Spur blivt, de flüggt… So eenfach is dat. Is nu al een poor Maande nich anfullen. Avers se mutt jo ok de groot Bassch för Europa speelen. Dor kann keen sik nich ok noch mit so´n Speelkram as Binnenpolitik afgeven, dorför hett se jo ok nuch Lüüd, de se no de tokamen Wahl nich mehr bruukt. Ik hoff jo ´n beeten, dat dor wat rutkümmt, wat hüüt noch keeneen denken mag, orer as „unmöglich„ afdoon ward und hoff op denn Michel. Slapmütz afsetten, mit´n Mors vun Kanapee koomen und to de Wahl goon. Nich to Hus sitten, nee, mol wiesen, dat wi noch een demokratisch Staat sünd und dat  de Macht ut dat Volk kümmt. De Lobbylüüd, de as Blootegel an de Politikers bammelt, rutsmieten ut all de politischen  Rebeeten. Dorop hoff ik. Avers de mersten  sünd jo al so innöölt woorn vun denn heelen Schiet, de se uns elkeen Dag andoot und vertellt, dat mi al heel swiemelig ward. Ik mutt woll mol no een EU-Dokter sööken, de een Rezept utstellt för een Heelmiddel tegen düsset malle Speel! Orer tegen „Spitzenpolitikers„!

 

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: