Vun de groote Politik 05/14

Leeve Lüüd,

nu is dat vörbi – dat Drama mit de Europawahl! De Michel is nich ganz dorbi ween, avers mit een tokneepen Oog hett he denn wohl doch denn Wegg to de Wahlurne funnen – he kratzt an de föftig Perzent – dat is tominst een Anstieg bi de Beteiligung – avers wat is dor los mit Europa!? Dat is nich nur een kottet Verfeeren öber de Tohlen, de de rechten Parteien kreegen hebbt, fehlt nich mol mehr veel an acht Perzent för de AfD, unse pocheetenden Nobarn hebbt de rechtsextreme Front no ganz boben puscht- de spinnen, de Gallier! Denn is dat viellicht doch ganz goot, dat de Michel op sien rechtet Oog nur blinzelt hett – stellt jüm nur mol vör, de Dütschen harrn een Viddel vun de Stimmen an de vergeben, de vör söbentig Johrn noch de Schietfarv as Mode dreegen hebbt!! Schloop ruhig noch´n beeten wieter, leeve Michel!- Viellicht riept dien Breegen jo noch een beeten no und wenn Du denn wedder denn Roop to de Urne vernehmen deist, mookst Du beiden Oogen op. Avers dor mütten Mutti und de annern so ehrlichen Demokraten noch´n Barg för doon, sünst ward dat wedder nix…   Bi de Insellüüd is dat wohl nich so för Europa loopen – dor teeknet sik dat jo af, dat dat nu wedder mol dorüm geiht, dat se sik vun´t Festland afwennen wüllt. Man, de sünd doch all de Johren eeren eegen Wegg kroopen – för Europa hebbt se jo meist nur stimmt, wenn dat wat to holen geev. Tjä, dor segg ik mol : Reisende sall man nich opholen!

Bi all dat Europagedusel kann man meist dat Gedöns in und üm de Ukraine vergeten. Dor hebbt se hüüt denn Willy Wonka ut´n Osten to´n Präsidenten mookt. Avers in de Ostukraine güng gornix – dor hebbt se de Lüüd mit Gewalt vun´t Wählen afhoolen und de Russ vun de KGB, de sik nu Präsident nöömt, vertellt in de Medien, he ward dat „Ergebnis respektieren“, avers he hett de Propagandamoschin in Gang und de streut Märchen in de Welt, de ´n Barg Blödsinn vertelln. Givt dat man good bi uns jo nich. Sünst wöör de Michel jo sofort op de Barrikaden gohn. Denn kann man jo nix vertelln! Denn Michel nich!

Bit´to´n nächsten Mol in Europa –

Niels

 

Wöörbook – Wörterbuch

tokneepen Oog – zugekniffenes Auge

Verfeeren – (verängstigt) zusammenzucken

Schietfarv – „braun“

pocheetende Nobarn – frosch(fr)essende Nachbarn

Insellüüd – Engländer

Breegen – Gehirn

 

Print Friendly, PDF & Email

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.