Vun de groote Politik 01/15



Moin leeve Lüüd,

bi dat groote Versammeln vun de Kanzlerin-Wohl-Vereen hett Angie sülm nülichst de dree Bookstaven wedder ut de Mottenkist holt – F D P. Keeneen hett bit dorhin noch een Wort över se fullen looten. Viellicht weern se ok „eenfach so„ ut de verbleeven süss Landtage rutsmetten woorn, wiel sik kuum noch een an se erinnern kann – „FD-wat? steiht dor op´n Wohlzettel?„  Nu hett dat avers doch een Erinnern geven und – sü- se sünd doch noch dor. De Lindner hett swadroniert, dat dat nu allens beeter ward – slechter geiht jo ok meist nich! Een niege Farv hebbt se sik geeven – rosa! Of dat wat nützt!? Avers, dat mutt man se looten, se hebbt jo recht – een niege Farv mutt her! De Hälft vun eere olen Farven hett de düütsche Alternative se jo klaut. Und sünner blau wöörn jo keene Bookstaven mehr op denn geelen Ünnergrund. Also gor nix mehr . Inhaltslos as de heele Vereen. As een leddig Blatt.                                       Nu hebbt se sik denn also „magenta„ utspekuliert. Wüllt se dormit eere Neechte to de Wirtschapp ünnermolen? Oder hebbt se de Farv wählt, üm sik sotoseggen nokelig do mooken as een rosa Swien und dat sall een Niebeginn dorstellen!? – Ik glööv jo man eher, dat düsset rosa Swien nu in süss Etappen slacht ward! Düt Johr geiht se dat all in Hamborg und Bremen an´n Mors.

De Slacht üm´t Avendland is ok alwedder mol in Gang. In Verkloren vun de Tied, in de de Lüüd in de DDR för Ännern in eer Land op de Stroot gahn sünd, mooken se – nu in Dresden, nich mehr in Leipzig – de so nöömten „Montagsdemos„. Se nöömt sik „Pegida„ und sünd een groot Sammelkumm för de bruunen und blauen Bangmookertruppen, de unsen Ünnergang dörch denn Islam opholen wüllt! – Ünnergang dörch denn Islam!? – De marken nich, dat de Ünnergang vun se sülm und unse marode Gesellschapp kümmt. Veel to veele Lüüd gooht düsse Parolengröler op denn Liem und bi de Demo achteran. Dat givt man good ok Lüüd, de dorgegen angohn und de ward jümmer mehr und mehr. Nu, in Schatten vun dat grusige Geschehen bi uns Nobar, de Franzmann, ward dat, so hoff ik noch energischer. De breegenklütterigen Bruunhemden und anner Mallköppe versöcht nu, düsse Tat vun een poor dörchknallte Idioten op de heele Religion to överdreegen und kloppt sik all op de Schuller: „ Seht, die Moslems sind alle Mörder und wollen das Abendland vernichten! Wir haben es Euch gesagt!„ Lüüd, lett jüm nich blenden! De sünd keen Finzel beeter as de „Dschihad-Kämpfers„. Wohrt jüm för düsset Pack und scheucht se vun Hoff! Bi de Jecken is jo ut PEGI-DA ganz fix PEGI-WEG worrn. Und vörher stünnen se al in Düstern, wiel se de Latüchten bi´n Kölner Dom utknipst harrn! So gefallt mi dat veel beeter, leeve Michel mit de Mütz! Bi mi op dat Snutenbook heff ik ok al schreven: „Ik bün Charlie!„ und ju!?

Vun Utknipsen snacken se jo ok all bi dat Thema Griechenland. Nodem se denn maroden Staat mit Milliarden vullpumpt hebbt und de Ulen nu viellicht na links afdriften und vertelln, dat se nich allens trüchtohlen wüllt, is de Regierungsfront ümswenkt (de rote Appendix in de „Groote Koalition„ süht dat wohl ok so!?). Se hebbt de groot Kanon rutholt und wüllt de Griechen nu viellicht rutsmieten ut de Währung oder, noch beter, ganz rut ut de EU! Noch vör nich alltolange Tied güng dat gorni an – keeneen ward fullen looten, hett de düütsche Macht anseggt und alle hebbt dorto nickkoppt! Man, Wöör sünd jo Schall und Ruuk und wat kümmert se dat Gesabbel vun güstern!? Nu ward eben dat Gegendeel verkünnt. Se seggt, ok een niege Regierung mutt… blablabla usw usw, se meenen avers : Wenn de Griechen nu ok noch een linke Regierung kreegen deen, denn ward se vör de Döör sett. De Geldadel mutt doch dat Avendland för de Sozialisten bewohren! – Und dat se een Weg finnen, dat dat nich bi´t Drohen blivt, dor bün ik vun övertüügt. De Merkel is jo nich nur de Mutti vun de Michels, se speelt jo ok al de Fru Rottenmeier vun Europa. Dor künnt se ut Brüssel vertelln, wat se wüllt. „Snackt wat jii wüllt – ik mook dat doch!„ – und dat ward se! Glöövst nich!?

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: