Vun de Groote Politik 04/15

Nu is dat al wedder passeert – dat tweete Mol in eene Week sünd in´n Mittelmeer een Barg Lüüd afsoopen. Und de Europa-Politikers kieken to. Is dat nich ünnerlooten Hölpliesten!? De Italieners und Malteser stooht alleen und verlooten dor. Se doon wat. Of dat to wenig is!? Ja. Klor is dat to wenig, avers ik denk mol, se hebbt eere Middel utschöpft. Se bruuken de Hölp vun dat heele Europa und eentlich de heele Welt, de hölpen kann. De Schlüser verdeent sik dumm und dösig, sticken sik de Schiens in de Puck und denn verrammeln se ok noch de Döörn in de rustigen Wracks, de se op Reisen schicken doot. Avers eentlich kümmt dat de EU-Lüüd jo woll good to pass. Se wörrn dat woll nich luud seggen, avers dat is jo so, dat de afsoopen Minschen ok de billigsten sünd. Dat Inbuddeln kust weniger as dat Prüfen, of de Minsch denn överhaupt „dat Recht“ hett, een Asylant to warrn… Und de Vullblood-Politikers an de Stammdischen is dat woll ok nur recht. Se mischen dat jo, as se dat vun eer Breegenwasch-Grootletter-Dagblatt und de nich-werbefrieen Senners intrichtert kreegen, so twüschen Dschungelcamp und Fruuentuusch und wie dat all heet, allens dörcheneen und denn ward de bruune Beer op´n Stammdisch knallt und as Appel der Erkenntnis verköfft! Avers dat is jo eentlich dat, wat de Bobersten wüllt. De Masse ward dumm hooln und kriegt sik tohus in de Grappen. Op Snutenbook künnt se sik utlooten und dat „liken“, wenn een een Schild postet, woop to lesen is, dat „Millionen för de Asylanten utgeven ward, avers för de Billung hebbt se nix!“ Dat is doch mol een Vermoon! Mag op dat erste Kieken ok so utsehen. Stimmt man avers nich. De Millionen för de Billung ward ok utgeven, man dat versickert all bi dat Rümdoktern und Versööken. Und – dat seggt se de Beer – und Appel – Stammdisch Politikers avers nich – se wüllt dat jo ok gor nich. De, de ünnen sünd, süllt ok ünnen blieven. Dat kann jo nich nur Managers geven und keen Footvulk mehr. Wo koomt wi denn dor hin!? Ansehn warst, wenn Du een Titel hest. Oder een Diplom. Oder nug Dolers. Utnohmen ünnerstrieken de Regel. Basta!Und nich anners!

Print Friendly, PDF & Email

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.