Verdwarste Saak!

Leve Lüüd,

künnt ji sik noch op de Wahl in verleden Harvst besinnen!? Is doch al en lütte Wiel her un allens dakig,  sachs hett man ok nich allens mitsneen, wat de Politikers dor so vun sik geven hebbt.

Doch dorför hebbt wi ja de moderne Technik un de Lüüd, de sik Journalisten nöömt. Dor geiht nix verschütt un so is dat keen Wunner, dat se de hunnert-Perzent-Martin, de he vör Johrsfrist noch weer, nu bi `n Neesenring packt un em dörch de Maneeg föhren doot. Erst de Oppositschoon verkünn´, denn doch sondeern. Goot, kann man sachs noch navulltrecken. De geele Aap hett ja de Steert introcken un na en Bült verdaane Weeken op de Balkon un en Klönsnack bi de Bunnespräsident , dorto noch dat Sabbeln un Lamenteern in de egen Reeg un de Medien…, dor meen he woll, dat mutt…

Nu hebbt se sondeert un sünd sik jümmers noch nich eens. Dat swatt-blau-bruune Sammelsuus ut de Bargen schriegt in elkeen Kamera un Mikrofon, wat se denn dor för en Twargenopstand in de egen Reeg hebbt. Un ok dor wedder anner Stimmwark bito, dat dat doch nich ween kann- so uneen döff de SPD doch nich! Und se künnt doch nich! – Doch se künnt, leve Lüüd! Dor is de ole Tant na Johrn wack worn un hett en DEMOKRAATSCHE Debatte föhrt un se hebbt dat goot maakt! Sik Oog in Oog uttotuschen un nich in de Weekdeelen to peern of „in die Fresse“ to kloppen! Dor kann ik blots graleern un all de annern in de groote Politik sült man de Hoot trecken! Aver se kennt dat nich mehr un so en Ümgang is se frömd worn. De Pulterer un Afnicker hebbt en Lehrstünn mitkreegen! Dat se denn knapp för de Verhanneln  mit de appeldwatschen Swatten stimmt hebbt… Dat mag een goot finn´of nich – aver dat weer tominst mol wedder rejell!  Liekers bün ik de Meen, dat de Sozis en wieter GroKo nich goot deit. Se warrn noch wat deeper de Stieg daal fallen in de Gunst vun´t Wahlvolk. De Schöörnhümpel ward grötter ween, wenn ok wat later, dorvun bün ik övertüügt. Noch grötter ward de, wenn de Schulz nu en Minister ward, dat har he ok utsloten…

Print Friendly, PDF & Email

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.

Diese Website verwendet Akismet, um Spam zu reduzieren. Erfahre mehr darüber, wie deine Kommentardaten verarbeitet werden.