Verdaan, logen un doch Recht behooln

Dag ok, leve Lüüd,

jümmers doot wi lesen un sachs ok lustern, dat so veel scheep löppt op de düütsche Scholl. De Politikers sünd schients all bregenklütterig, de Medien schrievt verdwarst un hetzt dat Volk op, elk Dag givt Fakenews un keeneen finn´t sik noch trech in us Sellschapp. Ik bün jo eegens een vun de Lüüd, de fast op de demokraatsche Böön steiht un sik dorför insett. Doch af un an versteiht en de Welt nich mehr un dat Twiefeln an use Rechtsstaat ward wedder en beten duller…So is mi dat jüst ok gahn. En Bagatell weer de Utlöser. Un dat weer so…

Dat weer noch an End vun verleden Johr, dor meen en Udel, dat ik nich ansnallt weer in mien Vehikel. Man he har sik verdaan. Doch he weer en vun de stuur Fraktion un wull sien Verkiek nich trüchnehm´. Ik heff nix ünnerschreven un al gorni ankennt, twee Weeken later keem de Bescheed vun´t Verkehrsamt. Ik heff denn Wedderspruch inleggt, de Udel hett sien Utsaag nich ännert – ut sien Verdaan weer nu en Löög woorn. De niege Bescheed heff ik nich annohmen´ un so güng de heele Vörgang to de ´Staatsanwaltschaft´. Dor hett mi de Richtersche denn schreven, dat se mien Verlang afleehn wull, wieldat se meen, dat ik de Frist nich inhooln harr. Togeven, dat weer op de letzte Drücker, man de Olsch bi´t Verkehrsamt harr mi de rechttiedig Ingang schriftli geven un ik heff dat de Richtersche denn ok antert. Doch Schietewat. Se bleev dorbi un ik kunn nu nich mol wieter, wieldat de Klaag erst över en Wert vun 200,-€ ´statthaft´ weer. So hett se twee Lüüd – mi un de Olsch vun Verkehrsamt – to´n Löger maakt un de, de logen hett, har opeens de Wohrheit seggt.

Ok en Oart Recht to spreken…

Un de Richtersche sülm? Hett se sik nu ok blots verdaan of is se nu de gröttste Lögersche in düsse Saak?

Nu heff ik de ole Wies direktemang an Latz ballert kregen – Recht to hebben heet noch lang nich ok Recht to kriegen…

Dat is nipp un nau so wohr as de Tatsaak, dat keeneen in use Sozialstaat  Smacht lien mutt…

Beste Gröten un en schöne Mierkensommer

Niels

 

 

 

Print Friendly, PDF & Email

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.

This site uses Akismet to reduce spam. Learn how your comment data is processed.