Sommerlock



Moin leeve Lüüd, ik dacht all, ik weer as de Politikers in een Sommerlock fullen. Aber nu sünd dor doch noch´n poor Sooken, de mi to Gehör komen sünd und de ik jüm nu vertellen will. Toerst wat richtig scheunet, dat häv ik sülbst beleevt: Vundaags weern wi in een „Barfootpark“- dor weern dree Deerns mit ehre Kinner und de schnackten plattdütsch – ok mit ehre lütten Jungs und Deerns – dat het mi bannig gefallen!!!
Aver dat givt man ok´n poor annere Sooken, de nich so fein sünd.

In Böddenstedt sall wohl de Biogas-Anlaag gröter mookt warn und denn wüllt se dor Höhnerschiet ut´n Osnabrücker Land mit rinschmieten. Denn müssen se mit groote Lasters jede Week rankoorn und denn müssen se dat ja ok „vörhooln“, also´n grooten Huupen opschütten, de denn all de finen Inhaltsstoffe in de Ümgebung und in´t Grundwater afgivt. Man hört, dat givt dat wohl schon in Dreilingen und Groot Süß, aver dor hebt se dat wohl eher „eenfach“ anfungen. Dor het keeneen wat vun mitkreegen. Man döff wohl gespannt ween, wo se denn de riesigen Huupens von Schiet ut unse „örtlichen“ Dierten-KZ´s hinbrigen wüllt.

Mi dünkt, dat kann doch all ni richtig ween – und denn künnt se den Schlund ni vullkreegen und wüllt de Anlaagen gröter und gröter moken – de EU fördert düsse Art „Landwirschaft“ jo schließlich mit bannig veele Toschüsse.
Und de Politikers „künnt dor nix mooken“, so seggen se – oder se wüllt ni…

Mannigmol frag ik mi, wo lang dat noch anduern kann, bevör de ganze Schiet kopeistergeiht.

Mi hett mol een Minsch vertellt, dat he de Meinung is, nur de Lüüd sallen Fleesch eeten, de ok mol een Diert schlacht hebbt. Dat is gor keen so schlechte Idee, find ik. Und mit de Lüüd, de düsse Massenhaltung bedrieben wüllt, sall man dat ähnlich moken – se müssen de glieke Tied ünner de glieken Bedingungen mit genau so veel Platz „pro Stück“ as se dat mit de Dierten moken wüllt in eern Stall utholen, und no 32 Daag ward se mit´n Radlader weer in de Freiheit trüchholt.
Ik glöv, denn wör dat düssen Wahnsinn so nich mehr lang geben!

To´n Schluss noch een anner Sak ut de afgründige Minschenwelt – In een anner Dörp nahbi vertellt man, dat dor een olen Mann rümlöpt, de Fruunslüüd Geld anbeeten deit, damit se em „gefällig“ sünd. Und abends sall he, wenn sine Huswieber no Hus föhrt sünd, üm de Hüsen schliekern as so´n Rott – dat mach ok ween, dat sik dat üm de sölbige Keerl hannelt, de ik vundaags mal in een anner Geschicht beschrieben hev…

Also, Lüüd, wohrt jüm wech vör gierige Minschen, ole Böcke und witte Rotten, de bi ju eer Unwisen drieben.
De annern leeten sik ni argern – bit to´n nächsten Mol!!!

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: