Paahlbuuten



 

Glosse

As ik de Daag wedder mol dörch de Lannen lopen bün, is mi dat nocheens opfullen… de Jägerslüüd hebbt wedder niege Paahlbuuten opstellt. Nich blots  eenfach utstaffeerte „Ansitt-Torns„, nee, de hebbt ehrder wat vun de Wachtorns vun dat duntomalen deelte Düütschland. Groote Komfortbuuten  hebbt se opstellt, mit Trepp un allens wat keen sik so utdenken kann. Bruukst blots noch een Stromansluß un een Schietemmer, denn kanns liekers ok in waahnen, heff ik so simmeleert. Ok de Afstand – dat is rein to´n verfehren. Op Sicht is noch vörsichtig utdrückt. Dat hett mi nich loslaaten un so heff ik  mi op de Söök na de Wuddeln vun düsse Ümstand maakt.

Un ik heff denn een „Informanten„ funnen, de mi dat verklaart hett. Düsse Minsch, H. Arvey heet he, de is meist op de heele Welt  ünnerwegens un kennt sik bannig good ut op dat politsche Rebeet. Un so hett he ok siene Fingers un liekers noch mehr mit in de Politik vun us Land Neddersassen. Un dor, hett he mi bi een vun us Geheimdreepen vertellt, dor is dat mächti an rumoren. De annern,  de wüllt  üm´t Verrecken  de Macht in´Land hebben. Un wenn se de denn hebbt, denn ward de „groote Plaan„ ümsett. Jüm is doch sachs al opfullen, dat  t.B. een Afordneten vun düsse Lüüd, de in Landdag sitten deit, keen Oogenblick utlött, mit sien populistische Utsagen op sik opmerksam to maaken. He versett de Lüüd in Angst un Bang, he schüürt Biller vun dootbeeten Gören un dat Isegrimm de Dörpen överrennt un een Blootbad anrichten wöör. Un to düsse Bangmaakerie deit denn nu de Plaan passen… Wenn de Lüüd op de Schiet rinfallt un bi de tokamen Wahl de denn wedder  wählen doot, – un dor sünd se fast vun övertüügt, hett H.Arvey mi vertellt, – denn künnt se ümsetten, wat se över de Joohrn mit de Hölp vun ehre Handlangers opbuut hebbt – een Netwark vun Torns över wiete Deele vun dat Land. Denn ward forts de Paragraphen een beten torechtstutzt un denn geiht dat los- op elke Torn sitten denn de scheetwütigen Helpslüüd, twüschen de Torns ward noch Fangtuuns spannt – so kann nümbseen sik verkruupen – un denn geiht de groote Jagd los – Isegrimm un all, wat dor noch an Deerten in´t Holt is, ward opscheucht un se künnt örntli „Strecke„ maaken! So maakt se dat denn rebeetwies dörch dat heele Land. Un, sast mol seehn, denn duert dat  een Johr, sachs twee un se künnt dat Halali blasen! – So sall dat warn, hett mien Informant mi vertellt, glööv oder glööv dat nich.

Un na dat Ümsetten vun de „groote Plaan„ is dat nich to End. Wi schrievt dat Johr 2020: De Landesvadder kiekt  stolt und nich blots een Traan in´t Oog vör luuter Glück  in de Kameras  und vertellt,  dat  düsse niege Regeern dat schafft hett! Nu ward dat endli wedder sicker in´t Holt un vör de Hüüsen ween! De Tieten, wo Isegrimm sik de Kinner holt hett, so ward he verkünnen, sünd nu, Gott wees bedankt, vörbi! Neddersassen, bald ok dat heele Düütschland, sünd frie vun dat Undeert un so sall dat ok blieven!  He  sabbelt sik meist in Raasch un fangt dat Spucken un Schriegen an un bleckt de Teehn! So een Sieg, dat is een Wiespaahl för de Minschen in us Land, swadroneert he wieter! -Un dat utwählte Volk, dat se för düsse Veranstalten platzeert hebbt, jubeleert und riet för Freid de Arms hoch! „Heil, heil, leeve Landesvadder, Du büst de gröttste! Keen so een Minschenfreeter utrotten kann, de sall us regeern för all Tieten!„… Un dat wiest se denn live op all Senners, dormit dat heele Volk düsse groote Tat wies ward.

Un de Michel sitt op sien Sofa un seggt to sien Fru: „ Dat is doch mol een staatschen Keerl! De sorgt för us! Keen so een groote Tat maaken kann, de  wüllt wi  wählen! Un nümbseen sall dat wagen, blots een dwars

Wort tegen use groote Vadder to seggen! De will ik denn woll torechtstutzen! Nee, noch beter !- Ik will em bi de Polizei melln! Un de rüümt denn op mit düsse Weltverbeeterer! Mit düsse Ökos un Kommunisten! Nu kaamt beter Tieten för us, Marie! Loos! Dor will ik op anstötten – hol mi gau noch een Buddel Beer ut de Köök!„

Un Marie steiht op un as se ünner de Döörstock steiht, dreiht se sik nocheens üm un seggt: „Michel, dat is so scheun, dat dat nu endli all beter ward! Aver  een heff ik nich verstaahn – worüm is dat so wichti, dat in´t Holt nu keen böös Deerten mehr givt!? – Dor givt dat doch gor keen Discounters un use Kinner hebbt wi doch ok bevör de Wulf nich dor speelen laaten!„

„Dor maak di man keen Kopp üm, Marie! De groote Vadder weet, wat för sien Volk wichti is!„, anter dor de Michel un treckt sik tofreeden sien Slaapmütz torecht!

 

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: