Opspeelt



PlattsnackerABMoin leeve Lüüd,

nülichst weern wi  in Uelzen op´n Wienmarkt, ik mutt togeven dat erste Mol, und wenn Uli dor ni opspeelt har, weer ik wohl ok düt Johr nich hingahn. Uli bin ik bi de Plattschnackers in Eimk gewohr worrn und he hett denn vun sin Optritt vertellt – dat he mit een annern Musikus dat „Duo Kandidel„ is und dor opspeeln sall. Und dat se plattdütsche Leeder speelt, dat weer dat Wichtigste dor an und sotoseggen de Utlöser för min ersten Besöök bi´n Wienmarkt. We keemen denn ok dor an, de Bühne weer so ungefähr op de Höchte vun den Uhlenköper (nee, ju Döösbaddels, nich denn „Inkööpspalast„, de Figur bi de Kark!) und se weern all´n beeten in Gang mit dat Trällern. Ik weer meist´n beeten opgeregt för luuter Freid und ik mach ju gern vertelln, dat dat richtig scheun weer – ik kunn alle Leeder, de se speelten, mitsingen und ik weer wohl so inbrünstig dorbi, dat de Lüüd mi schon ankeken, so har ik dat Geföhl. Viellicht hebbt se sik jo wunnert, dat so een fast jungen Kerl op Plattdütsch singen kann!? He kann dat sogar schnacken! Vun de Eimker Plattschnackers weern ok ´n ganze Barg bekannte Schnuten to sehn und ik glöv meist, nich nur mi und de hett dat Opspeeln bannig good gefallen.

Opspeelt hett sik wohl ok wedder een Börger,so is mi vun een „Informierten„ flüstert worrn. Düsse Börger hett wohl meent, dat mien  Opsatz vun letzten Maand (oder meent he mehr?) nich mit mien Noom versehen weer, so, as sik dat gehört. Nu, dat weer all wedder to gau schooten- in´t Internet steiht min Kürzel jümmers dorbi und in de Druckutgaav steiht mien Vörnom. Muttst nur mol genau kieken! Wo, segg ik an düsse Stell nich. Brill opsetten und söken, so as man fröher de Muus op de Witzesiet in „TV Hören und Sehen„  söken müss. Hest funnen!? Denn kannst mi ja de „Lösung„ seggen. Döffst ok ´n Rund Platt mit me schnacken -as Belohnung sotoseggen.

Und denn heff ik noch wat beleevt – Lüüd, dat hett de een oder anner bestimmt ok schon mitmokt, avers ik heff twee Welten bekeeken und dat innerhalb vun dree Daag! Dat güng um dat Hölpen bi´t Ümtrecken.

Dat Verdwarste doran weer, dat dat eene Hölpen vun Sabbeln in´n Vörwegg her ganz entspannt weer -  wi sünd frogt worrn und denn keem´n ganze Tied keene Noricht mehr. Erst op unse (!) Nofrag wör seggt:„ Nee, let jüm man Tied, wi sünd genug Lüüd,dat meist hebbt wi all röberfoohrt, schlopt man ut und fröhstückt schön kommodig…„ – Wat sall ik seggen!? Uns keem dat good to pass, wi harrn an düt Wochenend Besöök ut Meckelnborg. An düssen  Sünnabend harrn wi uns denn grad kommodig mit Kaffee und Rundstücken inricht, as dat Telefon pingeln dee… Ik bün rangohn und wöör denn froogt, ob wi nich´n beeten fixer eeten und denn to´n  Hölpen keemen kunnen, se weern nich genug Lüüd… Nu, ik heff denn fründlich antert, dat wi  dat Fröhstück´n beeten afkörten wöörn. Hebbt wi ok mokt. Denn keem dor awers noch wat twüschen und wi keemen wat later in dat Kuddelmuddel. Forts mit anfooten, inladen und an denn nieen Ort weer rut mit de Klamotten. De harrn sik dor awers regelrecht tobaut und wi wüssen deelwies gorni wohin mit dat Geraffel. Nu, as wi denn ok noch´n kloogen Spruch bekeemen, hebbt wi uns no dat Utloon vun Hoff mokt und seggt, dat se sik melden sall, wenn man wedder peern kann… Hett se bit vundaags ni doon- ik glööv, se is füünsch, har se glieks seggt, dat se uns denn ganzen Dagg to´n Hölpen bruken kann, weer dat wohl anners loopen, awers denn mutt man sik ni so opspeeln – Organisation is wat anners. De hebbt wi denn an denn Mondag dorop beleevt! Ik weer as Fohrer vun denn Transporter indeelt und as ik denn vör´t Hus keem, stünnen de ersten Deele all anne Straat- gau inlood, hin to´t nie Quartier – de Saken glieks in dat richtige Timmer rin, nächste Tour… No dree Stünn weern wi dörch mit dat kutschieren, dat eene Lock weer sauber und bessenrein, dat Auto weer afgeben und an Nomiddag weern alle Schappen opstellt. Dat mit toerst süss und denn noher veer Lüüd. Dree Dag later weern ok alle Kartons utpackt, wör us vertellt… So is dat wohl mit de Organisation – de een kann, de anner nich…

So Lüüd, hold jüm wacker -  passt op, dat june Nobarn sik nich de Strat, in de ju wohnt, ünner Nagel rieten

und let jüm ni argern!!!

 

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: