Oogenrieben



Leeve Lüüd,

nülichst heff ik mol, as meist elke Dag, us hiesige Dagblatt vör mi hat. Ik weer so an Schmökern, blots hier mol een Överschrift lesen, dor een lüttje Text… De Groote Politik har ik al achter mi un weer de Meen nu to de Politik vun Neddersassen un dat heele Düütschland to kamen (to´n Verklaaren: Ik lees de Dagblee meisttieds op araabsch – von achter na vörn…) Ik seet dor also heel entspannt un bläder de Siet vun´t Dagblatt üm… Doori no mol!!! – Wat heff ik mi verfeert! Wat maakt de dusselige Donald denn op düsse Siet, dach ik un riev mi de Oogen. Denn keek ik nocheens hin un lees ok de dicken swatten Bookstaven: „Landtagswahl: Althusmann ist Direktkandidat in Harburg„ stünn dor. „Un wat hett de Ami dormit to daan?„ schoot mi noch kott dörch de Kopp, denn keem mi dat Lüchten in´t Gesicht… De Figur dor op dat Bild – dat is gor ni de döösige Präsi vun de Amis… Dat is de Keerl vun de CDU!!!  So passt dat denn ok tohoop. Man dat de so utsüüht as de anner…Nich to glööven… Un wat is woll, wenn de ok so bräsig deit as de anner? Keeneen mag dat weeten!? Ik will keen amerikaanschen Spinnkram vun düsse t(r)umpig Oart bi us, dorüm ward he mien Stimm nich kriegen, dat steiht fast! Un jii süllt sik dat man ok good överleggen! Anners sünd jii noch Schuld doran, wenn dat so kümmt as bi de Amis! Aver sachs wüllt jii dat ok!? Wenn de düütsche Katteker-Steerten-Kopp denn würkli amerikaansch deit, denn döff ja liekers elkeen een Schetprügel hebben un denn sallst mol sehen! Denn duert dat keen Johr, denn is dat vörbi mit dat Gequese üm de Wulf. Denn steiht in´t Dagblatt wedder to lesen, dat dat letzt Undeert, de Isegrimm, nu nich mehr is! Hurra! Hurra! Hurra!- Und Volk sien leege Seel hett wedder Roh! De Olsch vun de rechtsbuten Partei (Nee, nich de CSU!) hett doch ok al föddert, dat scharp schooten warrn mutt!  All för de Sickerheet un dat Vadderland! Denn kümmt dat sachs noch to ´n Supergau! Een groot „Rechtskoalitschoon„, dormit de roote Martin blots keen Kanzeler ward! De Landdagsafordnete Hillmer is ok wedder fakener in´t Blatt to seehn (Markst Müüs!? -Dat geiht op Wahlen to – nu kaamt se wedder ut eehr Löcker kroopen). He gnaddert rüm und schriegt na „Sickerheit und wodenni denn de Regeern in Hannover us Kinder oppassen will„.  He versöcht partout, Sticken in de Spieken vun dat Regeerfohrrad to stuuken. Und hofft dorop, dat sien Vereen nich blots bi de Bundestagswahl een op´n Dassel kriegen deit! Süht ja düsse Daag na ut!

Denn man to!

Und jümmers doran denken: Lett jüm ni argern!

Niels

Quellen: Althusmann: https://www.az-online.de/niedersachsen/landtagswahl-niedersachsen-2018-althusmann-direktkandidat-harburg, 20.02.2017, 22:33Uhr, Trump: http://b-i.forbesimg.com, 20.02.2017, 22:29 Uhr;

To de Biller: Wokeen is de Ami!? – Bi de Düütsche hebbt se sien Vereen dortoschreeven, sünnst weer de Verwesselgefahr woll doch to groot!

http://b-i.forbesimg.com/mfonobongnsehe/files/2013/07/donald_trump_financial_disclosure.jpg

Bernd Althusmann

Print Friendly, PDF & Email

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: