Moin leeve Lüüd,

jii verfolgt dat ja bestimmt ok, wat dor to Tied afgeiht mit dat Beschieten vun de Verbrukers. Dat is allens nich mehr scheun, aber, weet jii wat? – All de Kloogschnackers, de meent, dat dat allens so sien mutt mit de „industrielle Produktion“, hebt doch sülms Schuld. Se wüllt jo bescheeten warn. Oder glövt jii wirklich, dat dat allens mit rechte Dinge togeiht, wenn de „Besetzungsdichte“ jümmers grötter und grötter ward und de Produkte dorto billiger warn mütt, dormit Dag een, Dag ut´n grootet Schnitzel oder een halve Gockel op´n Disch kümmt und tein Eier för negenunnegentig Penn (ach ne, wi möt ja hüttodags Cent seggen) dormit ok jedeen Dag dat Fröhstücksei  in´n Liev stoppt warn kann. Und wenn denn wat scheef geiht( also wat „opdekkt“ ward, weil sik mol wedder een vun düsse Bagage versabbelt hett), denn ward sik op de Biobranche stürzt (dor givt dat ja leider ok een poor  Verbrekers, de nur op Profit ut sünd) und all de kloogen dickwanstigen Lüüd hebbt wat noch klögeret dorto to seggen: “ Süh, dat hev ik all jümmers seggt. Dat is allens  Beschiss, ik köp nur bi mien Supermarkt üm de Eck.“ Wo immer de Eck ok ween mag.

Aber wi hebbt so veele kloge Lüüd bi uns in´n Land, de doch predigt, dat dat Öberleben nur mit Holen vun de Dierten in groote Stallungen und in Massen dat Leben in uns schönet Land und op de Welt sikkert, de meisten Gazetten doot eern Andeel dorto. Und wenn de dat all seggen, denn mut man dat ok glöben, oder nich!? De Lemminge und annere „Nich-Denker“ ward ni utstarben, dorto rekken de Antibiotikaandeele in´t Fleesch, dat se freeten,noch nich. Aber de Lüüd, de eern Breegen doch noch in Gebruk nehmen, de ward man good wedder mehr. So künnt wi noch een beeten Hoffnung hebben und nur hoffen, dat de denkenden Andeele bi unse Volksvertreter nu de richtigen Schritte gegen de grootmächtigen Lobbyisten inleiten doot, dormit se se all bi´n Mors kreegen! Dormit de Buer ok wedder mit stolz Buer sien döff, dormit de Verbruker gooden Gewetens inköpen kann(wenn he denn ni jümmers so jankerig allens rinschmiet in sien Inköpskorv) und vör allen Dingen de Dierten dat wedder good geiht, ok wenn se to´n End doch  in de Pann koomt!

Aber so is dat nunmol – wo de Profit lockt, dor sünd ok de Lüüd de doran Deel hebben wüllt. Und wo de Öberwachung nich hinhaut (oder de „Öberwacher“ viellicht ok eern Deel vun den Koken afkriegen wüllt) ufert dat alltied ut.

Dat wichtigste Rad an düsset Vehikel sünd aber jümmers noch de Verbrukers. Aber dor süht dat wohl bannig düster ut, denn, so weer dat vundaags in de AZ to lesen, een Paster hett dat bi eene Diskussion op´n Punkt bröcht: „Dat hett nix mit Werbung to do´n, sondern mit Bildung!“ – Na denn man Goode Nacht, Dütschland, wenn dat Inköpsverhalten vun de Lüüd sotoseggen dat Speegelbild vun eern Bildungsstand dorstellt, denn is dat wohl doch de Ünnergang vun´t Abendland… Da fallt mi noch in – de „Produzenten“ sünd ja letztlich ok Verbrukers – düsse armen Kreaturen is denn ja wohl gor ni mehr to hölpen!!!

So, nu hev ik doch wedder düt Thema anfoot und gor keen Platz mehr för annert Gesabbel – oder? – Doch, een lütten hev ik noch to´n Schluss:

Mi is to Gehör koomen, dat wohl een Spanner in een Dörp bi uns in de Samtgemeinde rümkrupt. Dat sall wohl een olen Mann sien, de in Düstern dörch de Büscher schliekert und denn bi de Lüüd, vörnehmlich alleenige Fruunslüüd, dörch de Schieben luert.

Man hett wohl siene Foottappen bit no sien Hus verfolgen kunnt, weil de Dussel in sien mallen Kopp  nie an dacht hett, dat Schnee liggen deit. Aber ik glöv, man hett dor  nix ut mookt und se hebbt em ni bi´n Mors kreegen…

So, dat weert aber wirklich- bit to´n nächsten Mol.

Lett jüm ni argern!!!

Niels