Nu is se vörbi – de 69. Dagfahrt in Bämsen



Plattsnacker NielsDag ok, leeve Lüüd,

verleden Weekenend weer een Barg los in dat Rebeet, In Uelzen un ok in anner Kuntreien. Ik to´n Bispill weer de Daag in Bämsen ünnerwegens. Dor leep  de 69te Dagfahrt, een Dreepen vun plattdüütsche Lüüd, de sik vör Schrieverie, Theater un Musik op Platt insetten, sülm wat mooken of giern tolustern un kieken. An Morn vun de Friedag geev dat al Programm in de School vun Himbergen. De Lehrersche in Unrohstand Heidrun Schlieker (in´t Net ünner >www.hschlieker.de <  künnt jii  bekieken, wat se so mooken deit) weer dor wedder to Besöök un hett mit de Eleven plattdüütsch Schoolünnerricht mookt. Friedag güng dat Klock veer denn offiziell los mit een Leedermooker un Verteller ut Rostock – Wolfgang Rieck speel un vertell in Kurhus. Dat weer heel moij antohöören un de Lüüd hett dat woll toseggt. An Avend güng dat wieter mit de Poetry Slam. Dor heff ik ok bi west. Leider hett dat mit de Uthang vun Plakaten un anner Warven nich so klappt un so weer dat Auditorium good to överblicken. De Vördreeg weern aver bannig good und an Sluss har Bolko Bullerdiek ut Hamborch de Nees vörn.

Börgermeester Feller un Gerrit Hoss

Börgermeester Feller un Gerrit Hoss

Sünnavend geev dat lyrische Vördreeg un een Fru vun de Uni Flensborch hett ehr Masterarbeit över dat Plattdüütsche in Nordfreesland vörstellt. Beeten Dikuschoon un na de Middagspaus geev dat denn „Op de Kist„ – dor kunn sik elkeen op´n Zettel schrieven, de wat op Platt vördreegen wull. Ölven lüüd hebbt sik düt Johr vör de Lüüd wagt un Geschichten of Gedichten vörleest. Denn geevt noch dat „Literarische Kleeblatt„, Veer Lüüd harrn sik veer Bööker in Vörfeld dörchleest un denn een Kriti afgeven. Moij mookt un heel interessant.

An Avend vun düsse tweete Dag weer denn een Theaterstück antoseehn, een Een-Person-Stück, dat hett „Sibirien„ heeten. Dat heff ik nu nich seehn, sall aver heel good speelt woorn sien. Tja, un denn weer ok de letzte Dag, de Sünndag ar an de Reehg. Na een Gottsdeenst op Platt in de Medinger Kark denn de Priesverleihn an. De Börgermeester Feller weer dor un de Laudatio hett Jan Graf vun NDR Hamborch hooln. Tja, de Preisdreeger, de döff liekers nich fehlen. Un dat dee he ok nich. Gerrit Hoss, de in München Musik studeert hett un dor ünnen denn op dat Plattdüütsche koomen is (!), kreeg de ölbente Bevensen Pries ut de Hann vun de Schultheiß un, de har Martin Feller meist vergeten, ok noch een poor smucke Blomen (kiek op´t Bild). Gerrit speel denn een poor Leeder, de viellicht noch een beeten nabeeteert warrn müsst, as he dat nömte, denn se sulln op sien niege CD, de tokamen Johr rutkümmt op. Weer liekers heel moij totolustern un dat weer een vigeliensche Minikunzert un een moij Afsluss vun de Dagfahrt 2016!

Worüm ik jüm dat vertell und nich över dat insleppte „Oktoberfest„!? – Wieldat dat heel good Programm in us Mudderspraak is un ik mag dat elkeen an Hart leggen, dor in 2017 ok mol hentokieken! Vun 15. bit to de 17. vun Harvstmaand (15.-17. September 2017) givt dat de 70ste Bämser Dagfahrt! Un dat sall doch mit veele Lüüd fiert warrn!

Niels

 

Hinterlasse einen Kommentar zum Beitrag

Niels Tümmler (NT)

Leeve Lüüd,

ik bün jo ok ünnerwegens, üm de Lüüd mit miene Lesens to ünnerhooln. Hebbt jii Spoß doran und wüllt mi mol "live" bi juu hebben!?

Denn schrivvt mi man an. Een Dag, wo dat passen deit, ward sik finnen.
Stüer een Breef mit juune Anfroog an niels.tuemmler@t-online.de.

Ik mell mi denn Trüch. Kann af und an mol´n beeten duern, avers ik versöök dat jümmer fix to antern! Niels

Tuemmlers Beiträge: